Бектенов туризм саласын сынап тастады

Үкімет отырысында премьер-министр Олжас Бектенов туризм саласында әлі де жүйелі мәселелер бар екенін мәлімдеді, - деп хабарлайды Massaget.kz тілшісі.

Отырыста министрлер мен бірқатар өңір әкімдерінің баяндамалары тыңдалды.

"Былтыр Президент азаматтардың көптеген шағымынан соң Алакөлдің айналасындағы, жалпы еліміздегі туристік орындардағы инфрақұрылым, сервис нашарлығын, қарапайым қауіпсіздік ережелері сақталмауын қатаң сынға алды. ...Жалпы өңірлерде оң динамика бар. Алайда туристік аймақтарда жүргізілген кешенді тексерістер бұл салада әлі де жүйелі мәселелер барын анықтады", - деді Олжас Бектенов.

Үкіметтің баспасөз қызметі

Үкімет басшысы бірқатар түйткілді мәселеге тоқталды:

• Көптеген нысанда интернет сапасы нашар. Жұмыстар әлі жоспарланып жатыр немесе қарқыны өте баяу.
• Бұқаралық ақпарат құралдары мен әлеуметтік желілерде санитария-эпидемиология талаптарын бұзу дерегі жиі көтеріледі.
• Көпшілікке танымал және шалғайда орналасқан туристік орындарға көлікпен жету мәселесіне, жол бойындағы сервиске қатысты сұрақтар бар.
• Кей жерлерде энергия қуаты жетіспейді.
• Тәулік бойы жұмыс істейтін медициналық бекеттерді, құқық қорғау органдары мен құтқару қызметтерін ұйымдастыру ісі барлық жерде бірдей шешімін таппай келеді.
• Туристік нысандарға жақын дәмханалар мен дүкендерде заттар сол күйі қымбат.
• Шашылып жатқан қоқыстарға, демалыс орындарына апаратын жолдар мен көлік тұрақтары жоқ болуына байланысты туристерден түсіп жатқан шағым көп.

Туризмдегі түйткілді мәселелерді шешу үшін премьер-министр жедел үйлестіру кеңесін құруды тапсырды.

Қызықты жаңалықтар мен видеоларды көру үшін TikTok арнамызға жазылыңыз!