"Бекболат Тілеухан мырзаға сендім": Kausar Travel директоры сотта даулы мәлімдеме жасады

Шымкентте Kausar Travel компаниясына қатысты даулы іске нүкте қойылды, - деп хабарлайды Massaget.kz тілшісі otyrar.kz-ке сілтеме жасап.

Тергеу мәліметтері бойынша Кausar Travel туристік фирмасының басшысы Қазақстанның түкпір-түкпірінен 245 адамды алдаған. Зардап шеккендер қасиетті жерге бару үшін кем дегенде мың доллар төлепті. Олардың кейбіреулері Қазақстаннан ұшып кете алмаса, ал кейбіреулері шет елде баспанасыз, ақшасыз, тамақсыз қалды. Залал сомасы 254 миллион теңгеден асты.

Айыпталушы орындығында туристік фирманың директоры болды. Ол ірі көлемде алаяқтық жасады деп айыпталып отыр. Сотталушы үкім шығарар алдында өзін ақтауға тырысқан. Айыпталушының айтуынша, ол барлық ақшаны басқа адамға жіберген.

"Өзімді кінәлі деп санамаймын. Бизнесті дұрыс жүргізе алмағаным үшін ғана кінәлі шығармын. Өзім де алданып, Бекболат Тілеухан мырзаға сендім. Мен ұсталған күннен бастап бұл туралы айтып келе жатырмын, менде чектер бар. Сондай-ақ, 522 миллион теңге - Бекболат Тілеуханға берілген компания қаражаты, 128 миллион теңге - жеке қаражатым, мен оларды да Бекболатқа бердім. Сондықтан мен барлық инстанцияға өтініш жаздым. Қазір зардап шеккендер 1200 адам деп жатыр. 238 адам ұшып кетпегенін, қалғандары қажылықтарын өтегенін сенімді түрде айта аламын", - дейді сотталушы.

Тергеу турфирма директорының сөзіне ешқандай дәлел таппады. Сот мәліметінше, Бекболат Тілеуханның іске қатысы жоқ.

Судья Kausar Trаvel басшысын кінәлі деп тауып, алты жылға бас бостандығынан айыру жазасын тағайындайды. Сотталушы барлық зардап шеккен адамға материалдық шығын төлеуге міндетті, ал бұл шамамен 225 миллион теңге болады.

Бұл іс үш айдан аса уақыт бойы қаралды. Нәтижесінде көптеген адам үкіммен келіспеді. Олардың айтуынша, бұл турфирманы белсенді түрде жарнамалаған қазақстандық эстрада жұлдыздарын да жауапкершілікке тарту қажет.

"Сот үкімі тым жұмсақ, алданғандар тым көп. Оған кем дегенде 10 жыл беру керек. Сотталушы Медет Мұратбайұлы тергеу изоляторында 10 ай болды. Заң бойынша тергеу изоляторындағы бір күн бір жарым күн ретінде есептеледі. Есептесеңіз, оның мерзімінен бір жарым жыл алып тасталады. Сонымен қатар, Кausar Trаvel-ді жарнамалаған қазақстандық эстрада жұлдыздары жауапкершілікке тартылуға тиіс. Олардың арасында Айнұр Тұрсынбаева, Нұржан Керменбаев, "Жігіттер" тобы және Нұрлан Қоянбаев болды. Біз оларға сендік", - дейді зардап шеккендердің бірі Нұрлан Серғазиев.

Қазақстандық эстрада жұлдыздарынан да соталды тергеу кезінде жауап алынған. Әртістер бұл істе куәгер ретінде қатысып, турфирма директорының жаман ниеті туралы білмейтінін мәлімдепті.

Сотталған кәсіпкер өз кінәсін мойындамады. Сот үкімі әлі күшіне енген жоқ.

Еске салайық, бұған дейін Kausar Travel директоры сотталғаны хабарланған еді. 

Тағы да оқи отырыңыздар: Жиі боянатын қыздар тез қартая ма?

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!