"Бәйтерек" холдингі "Сбербанк Қазақстанды" сатып алу бойынша келіссөздер жүргізіп жатыр
!["Бәйтерек" холдингі "Сбербанк Қазақстанды" сатып алу бойынша келіссөздер жүргізіп жатыр](/userdata/news/news_68643/image_l.jpg)
"Бәйтерек" ұлттық басқарушы холдингі "Сбербанк Қазақстанды" сатып алу бойынша келіссөздер жүргізіп жатыр. Ақпаратты Қаржы нарығын реттеу және дамыту агенттігінің төрайымы Мәдина Әбілқасымова растады, - деп хабарлайды Мassaget.kz тілшісі.
Оның айтуынша, "Сбербанк Қазақстанды" сатып алу туралы шешім Ресейге салынған санкциялық шектеулерге байланысты қабылданған.
"Шынында да, қазір "Сбербанк Қазақстанды" сату мәселесі талқыланып жатыр. Бұл - "Сбербанк Ресей" ЖАҚ-тың еншілес ұйымы. Ресейде бұл банкке санкция салынғандықтан, банк шетелдік валюталарда операция жасай алмайды. Шетелдік корреспондент-банктердегі шоттары жабылып, жаңа қаржыландыруды тарту мүмкіндігі шектеулі. Осыған байланысты "Сбербанк Ресей" өзінің еншілес ұйымын Қазақстанда сату туралы шешім қабылдады және қазіргі уақытта "Бәйтерек" холдингімен банкті сату туралы тиісті келіссөз жүргізіліп жатыр", -деді Әбілқасымова.
"Бәйтерек" ҰБХ-ның жалғыз акционері - Қазақстан үкіметі. Холдинг құрамына 8 еншілес ұйым кіреді: "Қазақстанның даму банкі", "Отбасы банк", "Даму" ӨДҚ, "Қазақстандық тұрғын үй компаниясы", Kazakh Export, "Қазына Капитал Менеджмент", "Аграрлық несие корпорациясы", "ҚазАгроҚаржы" АҚ.
Г. Досымшалова