Бас жүлде 4 млн теңге. Жас қаламгерлерге Президенттік арнаулы әдеби сыйлық жарияланды
![Бас жүлде 4 млн теңге. Жас қаламгерлерге Президенттік арнаулы әдеби сыйлық жарияланды](/userdata/news/news_84724/image_l.jpg)
ҚР Мәдениет және спорт министрлігі елімізде тұңғыш рет қазақстандық жас жазушылар мен ақындарға арналған Президенттік арнаулы әдеби сыйлық жариялады.
Елімізде биыл тұңғыш рет дарынды жастарға мемлекеттік қолдау көрсету, ақын-жазушылардың жаңа буынын қалыптастыру мақсатында Президенттік арнаулы әдеби сыйлық табысталады. Бұл туралы жас қаламгерлермен кездесу барысында Мәдениет және спорт министрі Асхат Оралов мәлімдеді.
Байқауға 18-35 жас аралығындағы ақын-жазушылар үміткер бола алады.
Президеттік әдеби сыйлық негізгі 4 номинация бойынша үздіктерді анықтайды. Үміткерлер "Проза", "Поэзия", "Драматургия" және "Балалар әдебиеті" бойынша өз еңбектерін ұсына алады. Әр номинацияда жеңімпазға 4 млн теңге сыйақы және "Президенттік арнаулы әдеби сыйлықтың лауреаты" атағы, диплом және төсбелгі беріледі.
"Мұндай бастамалар отандық әдебиетті дамыту үшін ғана емес, қазақ тіліндегі контентті көбейту үшін, әсіресе балалар әдебиеті саласындағы контентті көбейту үшін қажет. Бүгінде министрлік театр өнеріне үлкен көңіл бөліп отыр. Біздің мақсатымыз - отандық авторлардың қойылымдарының санын арттыру. Бұл мақсатқа қол жеткізу үшін жас драматургтер маңызды рөл атқаратынына сенімдімін",- деді Мәдениет және спорт министрі Асхат Оралов.
Өтінімдер 2023 жылғы 1 маусымнан 30 маусымға дейін, қағаз және электронды нұсқада қабылданады. Басты шарт – Президенттік әдеби сыйлыққа ұсынылатын жұмыс осыған дейін халықаралық және ұлттық байқауларға қатыспаған, тың туынды болуы керек.
Байқаудың толық шартын мына сілтемеге өтіп көре аласыз.
Т. Раушанұлы