Премьер-министр Олжас Бектенов Үкімет отырысында цифрландыру арқылы артық шығындар мен қажетсіз құрылымдарды азайту қажет екенін айтты, - деп хабарлайды Massaget.kz тілшісі.
Олжас Бектенов Әділет министрлігінің қызметіндегі орынсыз шығындарды азайту қажет екенін жеткізді. Ол шығындарды оңтайландыру цифрлық технологияларды енгізу арқылы жүзеге асырылуы керек екенін баса айтты. Бұл тәсіл министрлік жұмысының тиімділігін арттыруға бағытталған.
"Цифрландыру арқылы артық шығындар мен қажетсіз құрылымдарды қысқарту қажет. Нәтижесінде жалпы мемлекеттік аппараттың тиімділігі артады. Бұл барлық мемлекеттік органға қатысты", - деді премьер-министр.
Еске салайық, 28 қаңтарда Астанада өткен Үкіметтің кеңейтілген отырысында Мемлекет басшысы Қасым-Жомарт Тоқаев Үкімет қанша қиын болса да, жаппай үнемдеуге көшіп, бюджет қаржысын тек аса өзекті мәселелерді шешуге жұмсауы керек екенін айтты.
"Үкімет қаншалық қиын болса да, жаппай үнемдеуге көшіп, бюджет қаржысын тек аса өзекті мәселелерді шешуге жұмсауы керек. Көрпеге қарай көсілетін уақыт келді. Орынсыз шығынды тоқтатып, аяғымызды тартып басу қажет", - деді Президент.
Instagram парақшамызға жазылып, ең қызықты ақпараттарды бірінші болып оқыңыз!
Ж. Қадыржанова