Балабақшаға барғысы келмеген қызды көшеде ұрып-тепкен әпкесіне қатысты сот шешімі шықты
![Балабақшаға барғысы келмеген қызды көшеде ұрып-тепкен әпкесіне қатысты сот шешімі шықты](/userdata/news/news_89045/image_l.png)
Елордалық сот туысының кішкентай қызды ұрып жатқаны түсірілген видео бойынша шешім шығарды, - деп хабарлайды Massaget.kz тілшісі.
Видео әлеуметтік желіге 14 тамызда шыққан. Полиция ақпаратына сүйенсек, бес жасар қыз балабақшаға барғысы келмей, наразылық білдірген. Бұған оның 17 жастағы туыс әпкесі ашуланып, оны ұрған. 17 тамызда елордалық сот іс бойынша шешім шығарды.
"Астананың әкімшілік құқық бұзушылықтар жөніндегі мамандандырылған ауданаралық соты ұрып-соғу дерегі бойынша (ӘҚБтК-нің 73-2-бабы 1-1-бөлігі) А.-ға қатысты іс қарады. Сот А. кәмелетке толмаған Ж.-ға балабақшаға барғысы келмей наразылық білдіргені үшін физикалық күш қолданғаннан ауырсыну туып, денсаулығына жеңіл зиян келтіргенін анықтады", - делінген хабарламада.
Сот мәліметінше, қыздың кінәсі мойындау айғақтары, заңды өкілдің түсіндірмесі, әкімшілік құқық бұзушылық туралы хаттамасы, бейнежазба және істің басқа материалдары арқылы дәлелденген.
"А. баланың ата-анасымен татуласып, олар арыз бергеннен кейін сот қаулысымен іс тоқтатылды (ӘҚБтК 64-бабының 1-1-бөлігі)", - деп қосты сот.
Сот шешімі заңды күшіне енген жоқ.
Қызықты жаңалықтар мен видеоларды көру үшін TikTok арнамызға жазылыңыз!
Д. Шәріпхан