АҚШ-тағы президент сайлауының алдын ала нәтижелері жарияланды. Америка Құрама Штаттарындағы президент сайлауының жеңімпазы - Дональд Трамп. Мұндай мәлімдемені бірнеше америкалық БАҚ жасады, - деп хабарлайды Massaget.kz тілшісі.
Fox News-тің мәліметінше, Трамп 277 дауыс алды, бұл оның президент сайлауында жеңіске жеткенін білдіреді.
The Hill басылымы да Дональд Трамп сайлауда жеңіске жеткенін мәлімдеді. Трамп Пенсильвания мен Аляскада да көш бастаған.
Бұл деректерді соңғы нәтиже деп санауға болмайды, өйткені дауыс санау бірнеше күнге созылуы мүмкін.
Айта кетейік, Америка Құрама Штаттарында президент сайлауы өтіп жатыр. Негізгі кандидаттар - республикашылар атынан Дональд Трамп және демократтар атынан Камала Харрис. Бұл - елдің 47-ші президенті сайланатын 60-шы президенттік сайлау.
Еске салайық, бұған дейін АҚШ-тағы алғашқы сайлау учаскелері жабылғаны хабарланды.
Кейін Associated Press мынадай статистика келтірді: Трампта 230 дауыс, Харристе 187 дауыс. Мұндай деректерді "Америка дауысы" да келтірді: 230 және 179 дауыс.
Сонымен қатар, Трамп негізгі жеті штаттың алтауында көш бастады.
Анықтама: Сайлауда америкалықтар жаңа президентті ғана емес, вице-президентті, конгрестің 468 мүшесін, 11 штаттағы губернаторларды, сондай-ақ, жергілікті өзін-өзі басқару органдарына өкілдерді анықтайды.
Instagram парақшамызға жазылып, ең қызықты ақпараттарды бірінші болып оқыңыз!