Әзербайжан мен Ресейге Ақтаудағы ұшақ апатын тергеуге рұқсат беріледі

Әзербайжан мен Ресейге Ақтаудағы ұшақ апатын тергеуге рұқсат беріледі. Алайда ҚР Премьер-министрінің орынбасары Қанат Бозымбаев брифинг барысында бұл елдердің мамандары оқиғаның сот-медициналық сараптамасына қатыспайтынын мәлімдеді, - деп хабарлайды Massaget.kz тілшісі.

Вице-премьер бұл туралы 26 желтоқсанда Ақтаудағы ұшақ апатына қатысты кейінгі мәліметтер жария етілген брифингіде айтты.

"Ресей мен Әзербайжанның құқық қорғау органдарына криминалистикалық тергеуге қатысуға рұқсат етілмейді (ҚР Қылмыстық іс жүргізу кодексінің 566-бабына сәйкес - ескерт.), бірақ олар ұшақ апатын тергеуге қатысады, - деді Қанат Бозымбаев брифинг кезінде.

Ақтауда апатқа ұшыраған Azerbaijan Airlines ұшағының басқару жүйесі, биіктегі рөлі және элерондары істен шыққан. Бұл туралы Маңғыстау облысында өткен брифингте көлік министрі Марат Қарабаев айтты.

Ақтаудағы ұшақ апаты туралы не белгілі?

Еске салайық, 25 желтоқсанда Ақтау маңында Бакуден Грозныйға ұшып бара жатқан ұшақ апатқа ұшырады. Бұл - Azerbaijan Airlines әуекомпаниясына тиесілі Эмбраер 190 ұшағы. Алдын ала ақпарат бойынша ұшақ бортында 67 адам, оның ішінде 5 экипаж мүшесі болған.

Кейінірек Қазақстанның Төтенше жағдайлар министрлігі өкілдері оқиға орнына барды. Құтқарушылар жеткен кезде ұшақ жанып жатқан.

Қазақстанның Көлік министрлігі де төтенше жағдайға байланысты мәлімдеме жасады. Ал әлеуметтік желіде оқиға орнынан видеолар тарады.

Кейінірек ТЖМ оқиға орнындағы өрт сөндірілгенін хабарлады. Маңғыстау облысының әкімі Нұрдәулет Қилыбай ұшақ апаты болған жерге барды. 

Көлік министрлігі ұшақ бортында болған адамдар жөнінде алдын ала мынадай ақпарат жариялады: бортта 37 Әзербайжан, 6 Қазақстан, 3 Қырғызстан, 16 РФ азаматы болған.

Президент Қасым-Жомарт Тоқаевтың тапсырмасымен ұшақ апатына қатысты комиссия құрылды. Комиссия құрамына премьер-министрдің орынбасары, Маңғыстау облысының әкімі, төтенше жағдайлар, көлік, сыртқы істер, ішкі істер, еңбек және халықты әлеуметтік қорғау, денсаулық сақтау министрліктерінің басшылығы, Бас көлік прокуроры кірді.

Көліктегі Полиция департаменті төтенше жағдайға байланысты қылмыстық іс қозғады.

Маңғыстау облыстық Денсаулық сақтау басқармасының алдын ала мәліметі бойынша 4 адам қаза тапқаны расталған.

Ақтау маңындағы ұшақ апатынан аман қалғандардың видеосы тарады.

Ал Azerbaijan Airlines жолаушылардың тізімін жариялады.

Қазақстанның Төтенше жағдайлар министрлігінің сағат 15.55-тегі мәліметі бойынша аман қалған 29 адам бар, оның ішінде 2-еуі - бала, олар ауруханаға жеткізілді.

Ақтаудағы ұшақ апатына қатысты Бас прокуратура мәлімдеме жасап, оқиға орнына елдің Бас көлік прокуроры барғанын хабарлады. Қылмыстық іс Қазақстан Республикасы Бас прокурорының ерекше бақылауында.

Мемлекет басшысы Қасым-Жомарт Тоқаев Әзербайжан президенті Ильхам Әлиевке көңіл айтып, мемлекеттік комиссия тиісті шаралар қабылдап, Әзербайжан тарапына көмек көрсететінін мәлімдеді.

Өзекті жаңалықтарды өз уақытында оқу үшін Facebook парақшамызға жазылыңыз!