Автомектеп оқымай-ақ, жүргізуші куәлігін қалай алуға болады?
![Автомектеп оқымай-ақ, жүргізуші куәлігін қалай алуға болады?](/userdata/news/news_93478/image_l.jpg)
Қазақстандықтарға жүргізуші куәлігін алу үшін міндетті түрде автомектепте оқудың қажеті жоқ. Себебі сіз өзіңіз дайындалып, куәлік алуға тест тапсыра аласыз. Massaget.kz тілшісі автомектепке бармай-ақ қалай жүргізуші куәлігін алуға болатыны туралы нұсқаулық жасады.
Жүргізуші куәлігін алу процесі бірнеше кезеңнен тұрады. Оған:
- жол қозғалысы ережелерін және көлік құралын басқаруды үйрену;
- құжат жинау;
- құжат тапсыру;
- емтихан тапсыру және жүргізуші куәлігін алу;
- жүргізуші куәлігін алу үшін төлем жасау.
Жол ережелерін өзіңіз қалай үйренуге болады?
ЖҚЕ (жол қозғалысы ережелері) қолжетімді, оны кез келген қазақстандық сайттан тегін үйренуге болады. Сондай-ақ, жол қозғалысы ережелеріне сәйкес кітап сатып алып, ережелерді түсіндіретін арнайы сабақ пен видео көруге болады.
Жол қозғалысы ережелерінен басқа, болашақ жүргізуші алғашқы медициналық көмек көрсету ережелерін біліп, көліктің қалай жұмыс істейтінін түсінуі керек. Бұл туралы ақпаратты әртүрлі анықтамалықтан, видеодан және интернет мақаладан таба алады.
Автомектеп оқымай, көлік жүргізуді қалай үйренуге болады?
Көлік жүргізуді рұқсаты бар, техникалық жарамды және оқытуға арналған көлік құралы бар адам ғана үйрете алады. Авто және мото нұсқаушыны әртүрлі онлайн хабарландыру орнында, сондай-ақ газеттегі немесе автомектептегі хабарландыру бөлімінде табуға болады.
Кейбір автомектептер азамат ресми түрде олардың білім алушысы болмаса да, оны оқыта береді. Алайда бұл жағдайда азаматқа автомектепті аяқтағаны туралы куәлік берілмейді. Нұсқаушымен сабақ тек көлік жүргізуді үйрету болып саналады.
Көлік құралын игеруге қажетті сабақтардың саны әр адам үшін әр түрлі. Нұсқаушы сізге көлік құралын басқаруды үйрену үшін қанша сағат керегін айта алады, сондай-ақ, егер емтихан тапсыруға толық дайын екеніңізге сенімді болмасаңыз, тағы бірнеше сағат сұрай аласыз.
Оқу кезінде қандай көлікте емтихан тапсырғыңыз келетініне байланысты "механика" немесе "автоматты" таңдауға болады. Бірақ маршрутты өзіңіз таңдай алмайсыз. Бастапқы дағдылар автодромда оқытылады, содан кейін оларды елді мекендегі оқу маршруттарда бекітіледі.
Емтиханды қайда тапсыра аласыз?
Жүргізуші куәлігін алуға емтиханды тек Халыққа қызмет көрсету орталығының (арнайы ХҚКО) мамандандырылған бөлімінде тапсыруға болады. Алайда, барлық елді мекенде оны тапсыруға мүмкіндік жоқ. Әдетте, емтихан облыс орталықтарында және республикалық маңызы бар қалада қабылданады.
Жүргізуші куәлігін алу емтиханы 2 кезеңнен тұрады - теориялық және практикалық.
Фото: "Азаматтарға арналған үкімет"
Егер емтихан тапсырушы бірінші рет теориялық немесе практикалық емтихан тапсыра алмаса, келесі күні оны қайта тапсыра алады. Ал екінші сәтсіз әрекеттен кейін қайта тапсыру бір айдан кейін ғана мүмкін болады. Практикалық емтиханды 3 рет те тапсыра алмаса, онда теориялық тест нәтижелері жойылып, емтиханды қайтадан 2 айдан кейін ғана тапсыруға мүмкіндік ашылады.
Автомектептерде оқымай, өздері дайындалғандар үшін де ережелер дәл осындай. Тек теориялық немесе практикалық емтиханнан 3 рет өте алмаса, олар автомектепте оқуға міндеттеледі. Олар курсты аяқтағаны туралы куәлік алғанға дейін білім алушыға емтихан тапсыруға жол берілмейді.
Теориялық тестілеуге арналған сұрақтар базасын әркім өз бетінше сатып алуға немесе ресми білім алушы болмай-ақ кез келген автомектеп арқылы алуға тырыса алады.
Практикалық емтихан тек мамандандырылған арнайы автодромда тапсырылады. Автокөлік пен мотоцикл үшін бөлек автодромдар бар. Таңдалған тізбекте сіз бәрін көрсетіп, түсіндіретін авто немесе мото нұсқаушымен бірге жүруге болады. Бұл қызмет ақылы және әр нұсқаушы бағаны өзі белгілейді.
Фото:elements.envato.com
Айта кетейік, бұған дейін көлік мектебін қалай дұрыс таңдау керегі хабарланған еді.
Тағы да оқи отырыңыздар: Суррогат ана қызметі қанша тұрады?
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Б. Жұмаділлә