Ауа райы: Таяуда күн суытып, бұршақ жауады

Қазақстанда таяуда күн суытып, бұршақ жауады, - деп хабарлайды Tengrinews.kz тілшісі "Қазгидромет" кәсіпорнына сілтеме жасап.

21-23 мамыр аралығында Қазақстан солтүстігінде қатты дауыл соғып, желдің екпіні секундына 30-32 метрге жетеді.

"Циклон Шығыс Сібірге қарай жылжиды, алайда таяудағы үш тәулікте суық атмосфералық фронттар республикамыздың ауа райына айтарлықтай әсер етеді. Жаңбыр мен кей жерлерде бұршақ жауады, желдің екпіні секундына 20-28 метр болады", - делінген хабарламада.

Сонымен қатар, Қазақстанның барлық аймағында ауа температурасы көпжылдық орташа нормадан 2-5 градусқа төмен болады деген болжам бар. Тек батыс облыстарда ғана жаңбыр тоқтап, ауа температурасы жоғарылайды.