Ауа райы: Оңтүстік пен батыста 38 градусқа дейін ыстық болады

Синоптиктер 26-28 мамырға арналған ауа райы болжамын жария етті, - деп хабарлайды Tengrinews.kz тілшісі "Қазгидромет" кәсіпорнына сілтеме жасап.

Синоптиктердің мәліметінше, Қазақстанның солтүстік-шығыс аудандарында орналасқан циклон мен онымен байланысты атмосфералық фронттар таяуда Батыс Сібірдің оңтүстігіне ауысады және алдағы уақытта шығысқа кетеді. Шығыс облыстарында онымен бірге жаңбыр, кей жерлерде бұршақ жауады. Сонымен қатар, желдің жылдамдығы секундына 15-20 метрге жетеді.

"Қалған аумақта найзағайлы өткінші жаңбыр жауады. Циклоннан кейін республикаға жоғары атмосфералық қысым аясы таралады, бірақ тропосферада қысым жырасының ықпалы сақталады, сондықтан республиканың кей жерлерінде найзағайлы өткінші жаңбыр сақталады, бірақ олар жаздағыдай жылы болады. Қазақстанның оңтүстігінде және батысында жауын-шышынсыз және ыстық болады деп күтіліп отыр, күндізгі температура 30-35, ал оңтүстік-батыста 38 градусқа дейін жоғарылайды", - делінген кәсіпорын хабарламасында.