Атырауда мас әйел полицей қызметкеріне пышақ сұқты, - деп хабарлайды Massaget.kz тілшісі.
Атырау облыстық Полиция департаментінің мәліметінше, оқиға 16 қазанда шамамен 20:50-де Привокзальный шағынауданындағы үйлердің бірінде болған. Екі учаскелік полиция инспекторы отбасылық жанжал бойынша шақыртуға келген.
"Қызметкерлер тұрмыстағы зорлық-зомбылық құрбандарын қорғау жөніндегі өз міндеттері шеңберінде әрекет етті. Жанжал тудырған ер адамды жеткізуге талпыныс кезінде пәтерде болған ер адамның мас күйдегі жұбайы учаскелік инспекторлардың бірінің арқасына пышақпен сұғып алған", - делінген хабарламада.
Серіктесі дер кезінде әрекет етіп, шабуылды тоқтатқан.
"Жараланған полицей Атырау облыстық ауруханасына жеткізілді. Сот-медициналық сараптама тағайындалды. Қылмыс құралы - асүйлік пышақ - тәркіленді. Күдіктінің әрекеті полицейлердің бейнетіркегішіне тіркелген. Әйел ұсталып, уақытша ұстау изоляторына қамалды", - делінген хабарламада.
Бұл дерек бойынша соталды тергеу басталды.
Өзекті жаңалықтарды өз уақытында оқу үшін Facebook парақшамызға жазылыңыз!
С. Бөлек