Атырауда жанармай бекетінде көлік өртенді

Атырауда полицей жанармай бекетінде өртенген көлікті сөндіріп, қауіптің алдын алды. Полиция оқиға орнында түсірілген кадрларды жариялады, - деп хабарлайды Massaget.kz тілшісі polisia.kz-ке сілтеме жасап.

Полицияның мәліметінше, бүгін, 7 қаңтарда сағат 10:20 шамасында Атырау полиция басқармасының патрульдік полиция батальоны қызметкері Данияр Жәрдемғали түнгі ауысымнан кейін үйіне қайтып бара жатқан. Осы сәтте ол қаладағы жанар-жағармай бекетінде Nissan автокөлігінің отқа оранып жатқанын байқаған.

Полицей дереу әрекетке көшіп, өртеніп жатқан көлікке жақындап, оттың жанармай бекетіне таралып кетпеуі үшін оны қауіпсіз жерге қарай итеріп апарды. Кейін өрт сөндіру құралын пайдаланып, жалынды ауыздықтаған.

Фото: polisia.kz

Осылайша, өртсөндірушілер келгенге дейін жалын тез арада сөндірілді.

Оқиға орнында зардап шеккендер жоқ. 

Өзекті жаңалықтарды өз уақытында оқу үшін Facebook парақшамызға жазылыңыз!