Ақмола облыстық сотында Атбасар ауданының Қылмыстық атқару жүйесі комитетінің 12 қызметкеріне қатысты қылмыстық іс бойынша сот үкімінің күші жойылды, - деп хабарлайды Massaget.kz тілшісі.
ҚАЖК қызметкерлері Атбасар қаласының түзеу мекемесінде жазасын өтеп жатқан сотталған адамдарға рұқсат етілмеген әдістерді қолданды деп айыпталған болатын (ҚК-нің 146-бабы 3-бөлігінің 1-тармағы бойынша, яғни азаптау).
"Бұған дейін алқабилер алқасының шешімімен ҚАЖК қызметкерлері кінәсіз деп танылды", - деп жазылған хабарламада.
Енді үкімнің күшін жоюға бірінші сатыдағы сот тарапынан жіберілген процестік қателер негіз болған:
- Алқабилердің қатысуымен талқыланбайтын мәселелер зерттелген. Бұл олардың жәбірленушілерге қатысты дұрыс емес пікірін тудыруға ықпал ету мүмкін.
- Сонымен қатар, бірқатар жәбірленушіге жарыссөздерде сөз сөйлеу мүмкіндігі қамтамасыз етілмеген.
"Бұл іс қылмыстық істер жөніндегі мамандандырылған ауданаралық сотына басқа құраммен жаңадан қарауға жолданды", - деп жазылған хабарламада.
Айта кетейік, сотталғандар соққыға жығылғаны туралы видеолар әлеуметтік желілерде 2023 жылы қыркүйекте тараған болатын.
Аптаның басты оқиғалары мен пайдалы видеоларды көру үшін YouTube арнамызға жазылыңыз
Ж. Қадыржанова