Астана қаласының қылмыстық істер жөніндегі ауданаралық соты алдау жолымен бөтеннің мүлкін бірнеше рет жымқыру фактісі бойынша тұрғынға қатысты үкім шығарды, - деп хабарлайды Massaget.kz тілшісі.
Айыптаудың мәні
2024 жылдың қазан айында сотталушы С. алдау жолымен бөтеннің мүлкін жымқыру мақсатында жәбірленуші М-дан Sony PlayStation 5 ойын құрылғысын жалға алып, оның рұқсатынсыз ломбардқа өткізіп, түскен ақшаны өз қалауы бойынша жұмсап, құрылғыны қайтарып бермей, жәбірленушіні әуре-сарсаңға салған.
Өз әрекеттерімен С. жәбірленуші М-ға 300 мың теңге сомасында материалдық залал келтірген.
Әрі қарай ол осыған ұқсас алаяқтық жасап, жәбірленуші К-ны алдап, 360 мың теңге сомасында материалдық шығын келтірген.
Сотталушының кінәсі өзінің мойындау айғақтарымен, жәбірленушілердің айғақтарымен және қылмыстық іс материалдарымен дәлелденді.
Тараптардың ұстанымы
Прокурор 3 жыл мерзімге бас бостандығын шектеу түрінде жаза тағайындауды сұрады.
Сотталушы өз кінәсін мойындап, өкініш білдіріп, залалды өтеп, іс бойынша дәлелдемелерді дауламады.
Жәбірленушілер жаза тағайындауды соттың қарауына қалдырды.
Жаза
ҚК 190-бабы 3-бөлігінің санкциясы 3 жылдан 7 жылға дейінгі мерзімге бас бостандығын шектеу немесе айыру түріндегі жазаны көздейді. Сот қылмыстық жауапкершілік пен жазаны жеңілдететін мән-жай ретінде шын жүректен өкінуін таныды. Ауырлататын мән-жайлар анықталған жоқ.
Сот үкімімен С. ҚК 190-бабы 3-бөлігінің 4-тармағында көзделген қылмыстық құқықбұзушылықты жасағаны үшін кінәлі деп танылып, оған 3 жыл мерзімге бас бостандығын шектеу түріндегі жаза тағайындалды.
Үкім заңды күшіне енген жоқ.
Аптаның басты оқиғалары мен пайдалы видеоларды көру үшін YouTube арнамызға жазылыңыз
С. Сатыбалдина