Астананың құрылыс нысанынан өнеркәсіптік үш альпинистің қаза болу фактісі бойынша үкім шықты, - деп хабарлайды Massaget.kz тілшісі.
Астананың қылмыстық істер жөніндегі ауданаралық соты құрылыс жұмыстарын жүргiзудің қауiпсiздiк қағидаларын бұзып, үш адамның абайсызда қайтыс болуы, адамның денсаулығына ауыр немесе ауырлығы орташа зиян келтiру фактісі бойынша Ш.-ға қатысты істі қарады (ҚК 277-бабы 3-бөлігі).
"Мердігер ЖК Ш. құрылыс жұмыстарын жүргізу қауіпсіздігі қағидаларын бұзып, қауіпсіз жағдайлар мен еңбекті қорғауды қамтамасыз етуге жауапты тұлға бола отырып, көтергіш сымарқанның техникалық жай-күйі мен жарамдылығын тексермеген. Биікте тұрғын үй кешенінің құрылыс-монтаж жұмыстарын жүргізген 4 өнеркәсіптік альпинистің сақтандыру сымарқаны техникалық талапқа сай бекітілмегені анықталды. Жазатайым оқиғадан абайсызда үш альпинист биіктіктен құлап, қаза тапты. Бір альпинист ауыр дене жарақатын алды", - делінген сот таратқан хабарламада.
Сотта прокурор айыпты қолдап, сотталушыны 4 жылға бас бостандығынан айыруды сұрады.
Барлық жәбірленуші сотталушыға бас бостандығынан айыру жазасын тағайындауды сұрады. Сотталушы кінәсін мойындаған жоқ. Қорғаушы тарап сотталушыдан қылмыс құрамының болмауына байланысты оны ақтауын сұрады.
Сотталушының кінәсі жәбірленушілердің, куәгерлердің, мамандар мен сарапшылардың айғақтарымен, оқиға орнын тексеру хаттамаларымен, сараптамалардың қорытындыларымен және өндірісте болған жазатайым оқиғаны арнайы тергеу актісімен дәлелденген.
"Сот Ш.-ны ҚК-нің 277-бабы 3-бөлігі бойынша кінәлі деп танып, 3 жыл мерзімге құрылыс-монтаж жұмыстары саласында басшылық лауазымдарды атқару құқығынан айыра отырып, 4 жыл мерзімге бас бостандығынан айыру жазасын тағайындады. Ш.-дан жәбірленушілердің пайдасына 5 миллион теңгеден және 10 миллион теңге моральдық зиян өндірілді", - делінген сот үкімінде.
Үкім заңды күшіне енген жоқ.
Өзекті жаңалықтарды өз уақытында оқу үшін Facebook парақшамызға жазылыңыз!