Астанада үш адам пәтерден 100 миллион теңгенің затын ұрлап кеткен
![Астанада үш адам пәтерден 100 миллион теңгенің затын ұрлап кеткен](/userdata/news/news_99872/image_l.jpg)
Астанада тұрғынның 100 миллион теңгеден аса сомаға бағаланған заттарын ұрлап кеткендер ұсталды, - деп хабарлайды Massaget.kz тілшісі Polisia.kz сайтына сілтеме жасап.
Күдіктілердің екеуі ұсталып, біреуі іздестіріліп жатыр. Елордада Сарыарқа ауданының полицейлері жедел-іздестіру шаралары барысында ірі пәтер ұрлығына қатысты деген күдікпен 46 және 60 жастағы екі ер адамды анықтады. Күдіктілер ұсталғаннан бірнеше күн бұрын жергілікті тұрғын полицияға хабарласып, пәтерінен 4 швейцариялық сағат, 2200 АҚШ доллары және 650 мың теңге ұрланғанын хабарлаған. Ер адам келтірілген материалдық шығынды 101 миллион теңгеден астам деп бағалаған.
Жәбірленушінің айтуынша, ол сағаттың жоғалып кеткенін Алматы қаласына 10 күннен астам сапарында болып, келген соң білген. Келгеннен кейін киім ауыстыратын бөлмеде заттарды сұрыптап жатқанда, ол ашылған сейфті көрген. Онда құны 110 мың АҚШ доллары тұратын Breguet Tourbillon, әрқайсысы 55 мың АҚШ доллары тұратын Franck Muller, мен Daniel Roth және 1000 АҚШ доллары тұратын Rado сағаттарының қолды болғанын аңғарған.
Сонымен қатар, сейфте тұрған 650 мың теңге мен 2200 АҚШ доллары да ұрланғанын білген. Жедел-іздестіру іс-шараларын жүргізу барысында жедел уәкілдер ұрылардың ізіне түсіп, оларды тапқан. Олар пәтердің иесі жоқ екенін біліп, үй-жайға кілттерді таңдау арқылы кіргені анықталған. Ұсталғандар кінәсін мойындап, ұрланған құнды заттар жартылай тәркіленді. Олар Шымкент қаласындағы базарда Breguet Tourbillon сағатын бұзып, алтын бөлшектерін белгісіз әйелге сатып жібергені де белгілі болған.
Жедел қызметкерлер күдіктілердің тұрғылықты жерін тінту барысында құлыптарды ашуға арналған құрылғылар мен негізгі ашқан кілттерді тәркіледі. Қазіргі уақытта топтың үшінші мүшесінің тұрған жерін анықтау үшін жедел-іздестіру жұмыстары жалғасуда. Ұсталғандар Астана қаласы ПД уақытша ұстау изоляторына қамалды, сотқа дейінгі тергеу амалдары жүргізіліп жатыр.
Instagram парақшамызға жазылып, ең қызықты ақпараттарды бірінші болып оқыңыз!
С. Сатыбалдина