Бала құқықтары жөніндегі уәкіл Динара Зәкиева Астанадағы тұрғын үй кешендерінің бірінің лифтінде жасөспірім балаға шабуыл жасаған оқиғаға қатысты кейбір мәліметтерді айтты, - деп хабарлайды Massaget.kz тілшісі.
Динара Зәкиева жасөспірім қайда екенін айтты. Ол тергеу изоляторында емес.
"Кеше өңірлік уәкілмен бірге ауруханаға барып, баланың әкесімен сөйлестім. Баланың жағдайы тұрақты, барлық көмек көрсетіліп жатыр. Шабуыл жасаған бала тергеу кезінде жағдайына байланысты денсаулық сақтау жүйесі мекемесіне орналастырылды. Баланың анасы жауапқа тартылғаны белгілі", - деді бала құқықтары жөніндегі уәкіл Tengrinews.kz-ке.
Оның айтуынша, қазір тергеу жүргізіліп жатыр.
"Бала арнайы бөлімде бақылауда", - деді Зәкиева.
2025 жылы 11 ақпанда Астанада 14 жастағы жасөспірім лифтіде балаға пышақпен шабуыл жасаған. Оқиғаны тергеу кезінде кәмелет жасына толмаған жасөспірім психоневрологиялық диспансерде есепте тұрғаны анықталған.
Астана Полиция департаменті бастығының орынбасары Қуаныш Орынбетовтің айтуынша, балаға жасалған шабуыл бойынша қылмыстық іс қозғалған.
Қалалық денсаулық сақтау басқармасының мәліметінше, зардап шеккен бала бес жаста. Оқиғадан кейін ол көпсалалы №2 қалалық балалар ауруханасының жақ-бет хирургиясы бөліміне жатқызылған.
Дәрігерлер оның жалпы жағдайын ауыр деп бағалады. Ал отадан кейін баланың жағдайы тұрақты екені айтылды.
Instagram парақшамызға жазылып, ең қызықты ақпараттарды бірінші болып оқыңыз!