Астанада жол бекетінде әйелді босандырып алған полицей марапатталды
![Астанада жол бекетінде әйелді босандырып алған полицей марапатталды](/userdata/news/news_31938/image_l.jpg)
Астана қаласы әкімдігінде аяғы ауыр келіншекті босандырып алған полиция қызметкері марапатталды, - деп хабарлайды Tengrinews.kz тілшісі әкімдік сайтына сілтеме жасап.
25 тамызда Астана қаласының ІІД жол-патрульдік полиция полкі жетінші ротасының екінші взводының командирі, капитан Бақыт Әлімқұлов Астана бекетінде жедел жәрдем қызметі жеткенге дейін өзі әйелді босандырып, сәбидің кіндігін кескен.
Астана қаласы Денсаулық сақтау басқармасының басшысы Ерік Байжүнісов полиция қызметкерін марапаттап, сәбидің өмірін сақтап қалғаны үшін алғысын білдірді. Әкімшілік атынан Бақыт Әлімұловқа бағалы сыйлық тапсырылды.
Қазір сәбидің анасы мен нәрестенің жағдайы жақсы, олар №3 перинаталды орталықтан үйіне шығарылды. Атап айту керек, бұл ананың бесінші перзенті екен. Бақыт Әлімқұлов аяғы ауыр келіншекке қол ұшын беруді өзінің азаматтық парызы деп санайтынын айтты. Полиция қызметкері осымен үшінші мәрте сәбиді босандыруға көмек көрсеткен.