Астанада Аудит бөлімінің басшысы 3,5 миллион теңге сомасында пара алмақ болған
![Астанада Аудит бөлімінің басшысы 3,5 миллион теңге сомасында пара алмақ болған](/userdata/news/news_103686/image_l.jpg)
Сыбайлас жемқорлыққа қарсы қызмет 30 мыңға жуық кәсіпкердің құқықтарын қорғады, - деп хабарлайды Massaget.kz тілшісі Антикорға сілтеме жасап.
Бизнесті қорғау Агенттіктің негізгі басымдықтарының бірі болып табылады. Антикор кәсіпкерлер үшін жүйелі әкімшілік кедергілерді жоюға бағытталған "Бизнеске жол" жобасын іске асырып жатыр.
"Бизнеске жол" жобасы іске қосылған сәттен бастап Сыбайлас жемқорлыққа қарсы қызметтің ұсынымдары бойынша 600-ден астам проблемалық кейстер шешіліп, 30 мыңға жуық кәсіпкерге көмек көрсетілді.
Жоба аясында бизнес үшін жүйелі кедергілерді жоюға ерекше назар аударылады.
Олардың ең көп саны жер қатынастары, салық салу, мемлекеттік сатып алу және инфрақұрылым объектілеріне қосылу салаларында анықталды.
Мысалы, Ақтөбе облысында "Aqtobe su-energy group" АҚ монополисті кәсіпкерлерден электр қондырғыларын бірлесіп пайдалануға шарт жасасуды талап еткен.
Нәтижесінде, 45 кәсіпкер ай сайын 50 мың теңгеден (жалпы сомасы 2,2 миллион теңге) төлеуге міндетті болған.
Бизнес есебінен монополист өзінің электр желілерін жөндегісі келген. Талаптарды орындамаған жағдайда электр энергиясын беруді тоқтату көзделген.
Ақтөбе облысы бойынша Департаменттің ұсынысы бойынша негізсіз міндеттемелер алып тасталды.
Жекелеген жағдайларда лауазымды адамдардың іс-әрекеттері қылмыстық құқық бұзушылыққа әкеп соқтыратынын, мұндай жағдайларда қылмыстық-құқықтық сипаттағы шаралар қабылданатынын атап өткен жөн.
Мәселен, Агенттік бизнесті қорғау бойынша Астана қаласының МКД Жанама салықтарды әкімшілендіру басқармасының Аудит бөлімінің басшысын әшкерелеп, 36 миллион теңге сомасында ҚҚС қайтару бойынша оң шешім қабылдағаны үшін кәсіпкерден 3,6 миллион теңге сомасында пара талап еткен.
Ақшаны алғаннан кейін ол ұсталды және соттың санкциясымен ҚР ҚПК-нің 147-бабына сәйкес қамауға алынды.
Оның әрекеттеріне қорытынды бағаны сот береді.
Бұдан басқа, Сыбайлас жемқорлыққа қарсы қызмет бизнесті қорғау бойынша қабылданып жатқан шаралар шеңберінде "Қазтеміртранс" АҚ (Қазақстан Темір Жолының еншілес кәсіпорны) филиалдарының басшыларымен заңсыз байытудың жемқорлық схемасын ашты, олар жүк вагондарының тапшылығын пайдалана отырып, жүк вагондарын кедергісіз және жеделдетіп бергені үшін кәсіпкерлерден жүйелі негізде пара алған.
Сот үкімімен "Қазтеміртранс" АҚ Ақмола және Қарағанды филиалдарының директорлары бірнеше рет пара алғаны үшін кінәлі деп танылып, 7 жылға бас бостандықтарынан айырылды.
Сот үкімі заңды күшіне енген жоқ.
Бизнесті қорғау жұмыстары жалғасып жатыр.
Өзекті жаңалықтарды өз уақытында оқу үшін Facebook парақшамызға жазылыңыз!
С. Бөлек