Астана тұрғындарына 86 500 теңгеге дейін беріледі: бұл көмекті кімдер ала алады?

Астанада мүгедектігі бар адамдарға 86 500 теңгеге дейін біржолғы әлеуметтік көмек төленеді. Мұндай төлем қазанның екінші жексенбісіне белгіленген Мүгедектігі бар адамдар күніне орай беріледі, - деп хабарлайды Massaget.kz тілшісі.

Әлеуметтік көмек елордада тіркелген мүгедектігі бар адамдарға арналған. Төлем мөлшері мүгедектік тобына байланысты.

Қолданыстағы ережелерге сәйкес төлем мөлшері мынадай болады:

• 86 500 теңге (20 АЕК) - бірінші топтағы мүгедектігі бар адамдарға;
• 43 250 теңге (10 АЕК) - екінші топтағы мүгедектігі бар адамдарға, сондай-ақ, барлық топтағы 18 жасқа дейінгі мүгедектігі бар балаларға;
• 21 625 теңге (5 АЕК) - үшінші топтағы мүгедектігі бар адамдарға.

Әлеуметтік көмек алу үшін өтініш берудің қажеті жоқ. Қаражат "Азаматтарға арналған үкімет" мемлекеттік корпорациясында бар мәлімет негізінде автоматты түрде төленеді.

Ережеге сәйкес біржолғы әлеуметтік көмек күнтізбелік жылда бір рет және бір негіз бойынша тағайындалады. Яғни азамат 2026 жылы басқа негіз бойынша біржолғы әлеуметтік көмек алып қойған болса, Мүгедектігі бар адамдар күніне орай оған қайта ақша төленбейді. 

Қызықты жаңалықтар мен видеоларды көру үшін TikTok арнамызға жазылыңыз!