Астанадағы №1 қалалық ауруханада жұмыс істеген мейірбикеден туберкулез анықталды. Әлеуметтік желіде тараған ақпаратты елордалық Денсаулық сақтау басқармасы растады, - деп хабарлайды Massaget.kz тілшісі.
Бұған дейін әлеуметтік желілерде осы ауруханада балалармен байланыста болған мейірбикенің туберкулезге шалдыққаны туралы мәлімет тараған еді.
Басқарма деректеріне сүйенсек, мейірбикенің жұмысқа рұқсаты болған. Ол туберкулезбен ауыратын науқастармен байланыста болған тұлғалардың қатарында болған.
"Кейінгі рет флюорографиялық тексеруден 2024 жылғы ақпанда емханада өткен. Сол кезде түсірілген суретте патология анықталмаған. Сәуірде медициналық көмекке жүгінгеннен кейін ауру белгілері белгілі болды. Кейінгі рет жұмысқа 24 сәуір күні шыққан. Қазір Қалалық фтизиопульмонология орталығында ем алып жатыр", — делінген басқарма жауабында.
Соңғы флюорографиялық тексеруден өткеніне алты айдан асқан байланыста болған қызметкерлер қайта тексерілген. Жалпы 39 адам тексеруден өтіп, барлығынан теріс нәтиже шыққан.
Сондай-ақ басқарма мәліметінше, мейірбикемен кейінгі үш айда байланыста болған адамдардың тізімі анықталған. Алайда олардың арасында ауру жұқтырғандар бар-жоғы нақты айтылмаған.
Оқиғадан кейін ауруханада төсек-орын жабдықтары мен матрастарға дезинфекция жүргізілді.
Instagram парақшамызға жазылып, ең қызықты ақпараттарды бірінші болып оқыңыз!