Аса бір арызданатын жағдай емес - Көкпар федерациясының президенті

Кеше Астанада өтіп жатқан V Дүниежүзілік көшпенділер ойындарында көкпардан финал кезінде Қазақстан мен Қырғызстан шабандоздары қақтығысып қалған болатын. Дау әлеуметтік желіде тез тарап, жұрттың қызу талқысына түсті. Оқиғаға қатысты Көкпар федерациясының президенті, мәжіліс депутаты Айдарбек Қожаназаров желідегі парақшасында пікір білдірді, - деп хабарлайды Massaget.kz тілшісі.

Ол көкпар нағыз батыр жігіттердің арасындағы бәсеке екенін жазған. 

"Көкпар федерациясының құрметті президенті ретінде, бірнеше жылдан бері көкпардың дамуына үлес қосып жүрген азамат ретінде, кешегі өткен финалдың куәгері ретінде қазақ-қырғыз арасындағы ақтық ойынға қатысты пікір білдірген дұрыс деп шештім.
Көкпар – нағыз батыр жігіттердің арасындағы бәсеке. Кейде аттың үстіндегі адамның эмоциясы доп қуған не боз кілемде алысып-жұлысқан спортшыдан басым түсіп жатады. Әр спорт түрінде ереже әртүрлі бұзылады. Көкпарда қамшысын сілтеп жіберсе, аса бір арызданатын жағдай емес. Жаппай көкпарда одан да қорқынышты кадрларды көріп жүрміз. Рас, кешегі ойында тәртіп бұзылды, төрешілер кеңесе келе тәртіп бұзған ойыншыға ескерту берді. 2 минутқа шетке шығарды. "Бас жарылса – бөрік ішінде, қол сынса – жең ішінде" дегендей, алаңдағы ала шаң сол жерде қалуы керек. Бұл әуелден көкпардың жазылмаған ережесі.
Екіншіден, төрешінің айтқаны заң! Мейлі қандай спорт түрін алсақ та, спортшы онымен салғыласпайды. Шамдануы мүмкін, келіспей сұрау салуы мүмкін, бірақ тулап, әдептен аттамайды. Әдемі ойын көрсетейік деген жерде, төрешіні тыңдау парыз. Әлемдік деңгейдегі кез келген спортта төрешіге бағынбау – құрметсіздік көрсету деген атымен жоқ.
Үшіншіден, саған құрмет көрсеткен жерде оған жауап ретінде ілтипат білдірсе қандай жарасымды. Іштегі отың күйдіріп сөнбей жатса, мойныңдағы медальді алып тастай бер. Түріңді тыржитып, теріс қарап тұрсаң да қабылданады. Бірақ қонақ қылып шақырып, жағдайыңды жасаған, ағайын деп ардақтаған, жүлдесін қолыңа ұстатып, арқаңнан қаққан мемлекеттің әнұраны ойнағанда бір сәтке сабыр етіп, елдік мүддені жоғары қою – әр спортшыға қажет қасиеттің бірі.
Сөз жоқ, қырғыз көкпаршылары тәуір дайындалған. Аттарын шебер баптаған. Бірақ қазақтың көкпаршылары анық басым түсті. Қырғыздар ойын алаңында 10 салым саламыз десе, біреу оған кедергі жасады ма?! Керек десе екі жақ тең түсіп, қосымша уақыт та берілді. Қосымша уақыт берілмей, "Қазақстан басым түсті" десе, ортаға қамшыны ең бірінші мына мен тастар едім. Құдайшылығын айтайық, Қазақстанның Ұлттық құрамасы таза жеңді! Алысты, жұлысты, бірақ ұтты! Жалпы дала ерлері үшін жеңілгенін мойындау да ерлік! Басқа артық сөз жоқ!
Екі мемлекеттің татулығы мен достығы – кез-келген ойынның нәтижесінен қадірлі. Бүгін қазақ жеңсе, ертең қырғыз ұтады. Ымыра мен ынтымақты ойласақ, әлі талай көкпар тартамыз. Қайта қазақ & қырғыз секілді мықты қарсылас шықпаса, көкпарда сән болар ма еді? Осыншама жанкүйер жиналып, қиқулап тік тұрып тамашалар ма еді?! Ашығын айтқанда, бізден басқа кімге керек бұл ойын?! Серкені ілеміз деп жүріп сыйымызды кетіріп алмайық. Қандай ғасыр, қандай заман келсе де, қазақ пен қырғызға тек бауырмалдық жарасса керек", - деді ол.

Еске салайық, Астанада өтіп жатқан V Дүниежүзілік көшпенділер ойындарында көкпардан Қазақстан мен Қырғызстан құрамалары арасындағы финал жанжалмен басталған болатын. 

Ойында бірінші салымды қазақстандық көкпаршы салды. Одан кейін қырғыз шабандоздары 3 салым салып, есепте алға шықты.

Бірінші кезеңнің аяқталуына 6 минуттай уақыт қалғанда көкпаршылар қақтығысып, ойын уақытша тоқтатылды. Араға жарты сағат сала ойын қайта жалғасты.

Қызықты жаңалықтар мен видеоларды көру үшін TikTok арнамызға жазылыңыз!