Арыста 5 жасар қызға сексуалдық сипаттағы қылмыстық әрекет жасаған педофил ісіне сот нүкте қойды. Істі Түркістан облысының қылмыстық істер жөніндегі мамандандырылған ауданаралық соты қарады. Айыпталушыға Қылмыстық кодекстің 121-бабы 4-бөлігімен айып тағылды, - деп хабарлайды Massaget.kz тілшісі otyrar.kz-ке сілтеме жасап.
Сот материалдарына сүйенсек, 2001 жылы дүниеге келген сотталушы - Арыста орналасқан №37 үйдің тұрғыны. Ол өзінің пәтерінен шығып, №39 мекенжайда орналасқан көпқабатты тұрғын үйдің алдына келген. 1-сыртқы есіктің кіре берісінде (подъезд) 5 жасар қыздың жалғыз өзі ойнап жүргенін көріп, сексуалдық сипаттағы зорлық-зомбылық іс-әрекеттерін жасау қылмыстық пиғылы пайда болған. Содан көпқабатты тұрғын үйдің баспалдақ дәлізіне кіріп, 2-қабаттан 3-қабатқа көтерілетін баспалдақтың орта бөлігіндегі алаңшаға бүлдіршіннің қолынан жетектеп алып барып, ешкімнің жоқ екеніне көз жеткізген. Кейін жас қызға сексуалдық сипаттағы қылмыстық әрекетін жасаған.
Сот отырысында сотталушы өз кінәсін толық мойындаған және оқиға болған кезде ішіне "жын кіріп кетті" деп жауап берген.
"Сот үкімімен сотталушы кінәлі деп танылып, оған 20 жылға бас бостандығынан айыру жазасы тағайындалды. Жазаны қылмыстық-атқару жүйесінің қауіпсіздігі орташа мекемесінде өтейді. Сонымен қатар сотталушы педагогикалық және кәмелетке толмағандармен жұмыс істеуге байланысты қызметпен айналысу құқығынан өмір бойына айырылды. Үкім заңды күшіне енген жоқ", - делінген Түркістан облыстық сотының мәліметінде.
Еске салайық, оқиға биыл 21 мамырда болған. Арам пиғылын іске асырған соң жас жігіт көпқабатты үйдің подъезінен шығып, темекі сатып алу үшін дүкенге барған. Ал бүлдіршін қыздың әкесі көпқабатты үй алдында өз көлігін жөндеп жатқан. Осы кезде жас қыз әкесіне болған оқиға мен тамағы ауырып жатқанын айтқан. Күдікті сол уақытта ұсталып, дереу қамауға алынды.
Instagram парақшамызға жазылып, ең қызықты ақпараттарды бірінші болып оқыңыз!