“Алтын дәуір орнайды“. Трамп жеңгенін мәлімдеді

Дональд Трамп Флоридада жақтастарының алдында сөз сөйлеп, сайлаудағы жеңісін жариялады, - деп хабарлайды Massaget.kz тілшісі.

Трамп сайлау нәтижесін "АҚШ тарихы бұрын білмеген саяси жеңіс" деп санайды. Ол екінші президенттік мерзімі ел тарихындағы "нағыз алтын дәуір" болатынын да мәлімдеді.

"Біз ешкім мүмкін емес деп санайтын кедергілерді жеңдік, ең керемет саяси оқиғаға қол жеткізгеніміз анық. ...Бірақ бұл - біздің ел бұрын-сонды көрмеген саяси жеңіс", - деді Трамп.

Ол Америка мен оның болашағы үшін күресуге уәде берді.

"Сіздер үшін, сіздің отбасыларыңыз үшін және сіздердің болашақтарыңыз үшін күресемін. Күшті, қауіпсіз және гүлденген Американы қамтамасыз етпейінше тоқтамаймын. Шынымен Американың алтын ғасыры болады. Бұл - Американы қайта ұлы етуге мүмкіндік беретін теңдессіз жеңіс", - деді Трамп.

Айта кетейік, Америка Құрама Штаттарында президент сайлауы өтіп жатыр. Негізгі кандидаттар - республикашылар атынан Дональд Трамп және демократтар атынан Камала Харрис. Бұл - елдің 47-ші президенті сайланатын 60-шы президенттік сайлау.

Еске салайық, бұған дейін АҚШ-тағы алғашқы сайлау учаскелері жабылғаны хабарланды.

Кейін Associated Press мынадай статистика келтірді: Трампта 230 дауыс, Харристе 187 дауыс. Мұндай деректерді "Америка дауысы" да келтірді: 230 және 179 дауыс.

Сонымен қатар, Трамп негізгі жеті штаттың алтауында көш бастады. 

Анықтама: Сайлауда америкалықтар жаңа президентті ғана емес, вице-президентті, конгрестің 468 мүшесін, 11 штаттағы губернаторларды, сондай-ақ, жергілікті өзін-өзі басқару органдарына өкілдерді анықтайды.

Өзекті жаңалықтарды өз уақытында оқу үшін Facebook парақшамызға жазылыңыз!