Бокстан Қазақстан ерлер құрамасының капитаны Айбек Оралбай Моңғолияның Ұлан-Батыр қаласында өтіп жатқан Азия чемпионатының финалында жеңіске жетті, - деп хабарлайды Massaget.kz тілшісі ҰОК-қа сілтеме жасап.
Отандасымыз 90 келіден жоғары салмақта Қытай өкілі Байикевузи Данабикемен кездесті.
Алғашқы раундта Айбек Оралбай 3:2 есебімен басым түсті. Екінші раундта да жерлесіміз соққыларын дәл дарыта білді. Тіпті үшінші раундта қарсыласын нокдаунға жіберді. Нәтижесінде төрешілердің шешімімен жеңіске жетті.
Осылайша Қазақстан ерлер құрамасы Азия чемпионатын сегіз медальмен аяқтады. Оразбек Асылқұлов (60 келіге дейін), Сабыржан Аққалықов (75 келіге дейін), Нұрбек Оралбай (85 келіге дейін) алтын медаль жеңіп алды. Төрехан Сабырхан (70 келіге дейін) күміс медальға ие болса, Махмұд Сабырхан (55 келіге дейін), Ертуған Зейнуллинов (65 келіге дейін) және Сағындық Тоғамбай (90 келіге дейін) жарысты қола медальмен аяқтады.
Аптаның басты оқиғалары мен пайдалы видеоларды көру үшін YouTube арнамызға жазылыңыз