8 қаңтардан бастап қар жауады деген болжамға байланысты Алматының коммуналдық қызметі күшейтілген жұмыс режиміне көшті, - деп хабарлайды Massaget.kz тілшісі.
"Қазгидромет" РМК-ның мәліметінше, 8 қаңтар күні түнде және таңертең қалада қардың қалыңдығы 9 мм-ге дейін жетіп, көктайғақ болуы мүмкін. Ауа температурасы түнде -5…-7 °С-қа дейін төмендеп, күндіз -2…0 °С шамасында болады.
7 қаңтар күні қар күреу жұмыстарына 438 арнайы техника мен 968 жұмысшы тартылды. 2024-2025 жылдары қысқы маусым басталғалы бері 220 мың текше метр қар шығарылды.
Коммуналдық инфрақұрылымды дамыту басқармасы жолды уақытылы әрі тиімді тазарту үшін қала тұрғындарына:
- автокөліктерді, әсіресе түнгі уақытта, жол жиегінде қоймауды;
- жолдар мен автотұрақтар бойына орнатылған ескерту конустарына назар аударуды ескертті.
"Қар шығару жұмыстары таулы және тау бөктеріндегі аудандарда ерекше назарға алынып, қар күреу жұмыстары белсенді жүргізіледі", - деп хабарлады Алматының коммуналдық инфрақұрылымды дамыту басқармасы.
Көлік жүргізушілері мен жаяу жүргіншілерге ұсыныстар:
- Көктайғаққа байланысты көлік жүргізушілерінен жылдамдық режимі мен көліктер арасындағы қашықтықты сақтау және қар шығару техникасы жұмыс істеп жатқан аумақтарда көлік қоймауға шақырады;
- Жаяу жүргіншілер жолдан өткенде, әсіресе көше дұрыс көрінбей қалған кезде және жол тайғақ болған жағдайда аса сақ болғаны жөн.
Instagram парақшамызға жазылып, ең қызықты ақпараттарды бірінші болып оқыңыз!
М. Лес