Полицейлер Алматы тұрғындарын 50 миллион теңгеге алдады деген күдікпен жас жігітті ұстады, - деп хабарлайды Polisia.kz.
1996 жылы туған А.-ға қатысты ҚР ҚК-нің 190-бабы, 4-бөлігі "Алаяқтық" бойынша қылмыстық іс қозғалды. Күдікті салынған ақшаны өсіммен қайтарып беруге уәде беріп, түрлі бизнес жобаларына инвесторларды тартып отырған. Оның әрекетінен келтірілген жалпы шығын мөлшері 50 миллион теңге.
"Жедел іс-шаралар жүргізіліп, күдікті ұсталды. Тергеу барысында оның осыған ұқсас бірнеше эпизодтарға қатысы бар екені анықталды. 2019 жылдан бері азамат бизнеске ақша саламын деген желеумен жергілікті тұрғындардың ақшасын жымқырған. Қазір зардап шеккендердің нақты саны анықталып жатыр, кейбірі әлі полицияға арызданбаған", - деді Алмалы аудандық полиция бөлімінің бастығы Есен Ысқақов.
Тергеу барысында күдіктіге қатысты қамауға алу түріндегі бұлтартпау шарасы таңдалды. Ол уақытша ұстау изоляторына қамалды.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!