Алматылық атқыштың әйелінің үйін полицейлер қоршауға алды
![Алматылық атқыштың әйелінің үйін полицейлер қоршауға алды](/userdata/news/news_87853/image_l.jpg)
Алматыда бес адамды атып өлтірген атқыш Игорь Дужновтың әйелінің үйін полиция қоршауға алды, - деп хабарлайды Massaget.kz тілшісі.
Бұған дейін БАҚ-та Анаида Демирчянның үйін сот орындаушылары босатып жатқаны хабарланған болатын. Үй қоршауға алынған. Полиция үйдің маңайына ешкімді жібермейді.
Алматы Полиция департаменті Tengrinews.kz тілшісіне "102" пультіне жеке сот орындаушысынан Ақбұлақ ықшамауданы Сыздықов көшесіндегі үйлердің бірін босату рәсімі кезінде атыс қаруы табылғаны туралы қоңырау түскенін хабарлады.
"Қазір оқиға орнында Алатау аудандық полиция бөлімінің жедел-тергеу тобы жұмыс істеп жатыр", - делінген хабарламада.
Еске салайық, оқиға 20 қыркүйекте кешке болған, шамамен сағат 17.20 шамасында Ақбұлақ мөлтек ауданындағы үй иесінің бірі аңшы мылтығынан оқ атқан. Куәгерлердің айтуынша, атыс бір минут ішінде болған. Алматылық атқыш бес адамды өлтірді. Қаза болғандар арасында екі полиция қызметкері, сот орындаушысы, сондай-ақ үйдің жаңа иесі мен куәгер бар.
2022 жылдың 24 сәуірінде сот 54 жастағы Игорь Дужновты екі полиция қызметкері мен сот орындаушысын, сондай-ақ үйдің жаңа қожайыны мен куәгерін өлтіргені үшін кінәлі деп тапты. Ол өмір бойына бас бостандығынан айыру жазасына кесілген.
Айта кетейік, маусымның аяғында Анаида Демирчян жеке сот орындаушысын үйіне кіргізбей қойған. Ол өзін және үйін өртеп жіберемін деп қорқытқан.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Д. Шәріпхан