Алматыда жылу желілерін жөндеу кезінде Батыс Желтоқсан көшесі бойынша жол жүру ішінара шектеледі, - деп хабарлайды Massaget.kz тілшісі.
Алматыда осы жылдың 24 сәуірі мен 31 мамыры аралығында Ганди көшесінен Тимирязев көшесіне дейін Батыс Желтоқсан көшесі бойында көлік қозғалысы ішінара шектеледі. Уақытша шектеулер магистральды құбырды ауыстыру және жол төсемін орташа жөндеу қажеттілігіне байланысты болып отыр.
Алматы әкімдігі баспасөз қызметінің хабарлауынша, 25 жылдық қызмет нормативтері бойынша есептелген аталған учаскемен өтетін құбыр 1992 жылдан бері 32 жылдан астам уақыт бойы пайдаланылып келеді. Мониторинг соңғы бес жылда мұнда 17 зақым тіркелгенін көрсетті.
"Құбырды жөндеу жұмыстары кезінде күн сайын сағат 07:00-ден 22:00-ге дейін Батыс Желтоқсан көшесі бойынша көлік қозғалысы солтүстік бағытта бір жақты болады. Күн сайын сағат 22.00-ден 07.00-ге дейін және демалыс күндері қозғалыс екі жаққа да жабылады", - делінген хабарламада.
Ганди көшесінен оңтүстік бағытта әл-Фараби даңғылына шығатын жол Қозыбаев көшесі бойынша ұйымдастырылады.
2 мамырдан бастап қалалық мобильділік басқармасы әл-Фараби даңғылынан Тимирязев көшесіне дейін Батыс Желтоқсан көшесінде орташа жөндеу жұмыстарын бастайды.
"Басында тротуарлар мен арық желілері жөнделеді, бүлінген жиектер ішінара ауыстырылады, содан кейін асфальт жабыны фрезерленеді. Құбырды және асфальт жабынының төменгі қабатын төсегеннен кейін жолдың бүкіл еніне полимерді қолдана отырып, асфальтбетон төсеу жүргізіледі. Қозғалыс толығымен 1 маусымға дейін қалпына келтіріледі. Мәжбүрлі қолайсыздықтарға түсіністікпен қарауды және көрсетілген учаскені айналып өту жолдарын алдын ала қарастыруды сұраймыз", - делінген хабарламада.
Өзекті жаңалықтарды өз уақытында оқу үшін Facebook парақшамызға жазылыңыз!