Алматыда пандемия кезінде салынған ауруханалар қазір бос тұр ма?
![Алматыда пандемия кезінде салынған ауруханалар қазір бос тұр ма?](/userdata/news/news_83939/image_l.jpg)
Алматы қалалық қоғамдық денсаулық сақтау департаменті коронавирус пандемиясы кезінде салынған модульдік ауруханалардың бос ғимараттары туралы ақпаратқа қатысты пікір білдірді , - деп хабарлайды Massaget.kz тілшісі Tengrinews.kz-ке сілтеме жасап.
Бұған дейін әлеуметтік желіде 2020 жылы 18 күнде салынған COVID-19 модульдік ауруханасының ғимараты қазір бос тұрғаны туралы ақпарат пайда болған еді. Желі қолданушылары нысанды балаларға арналған спорт кешеніне айналдыруға ұсыныс білдірді.
Алматы қалалық денсаулық сақтау басқармасы мәліметінше, Aport Mall ауданындағы 300 орындық және Саялы ауданындағы 280 орындық екі модульді аурухана бүгінде қалалық балалар жұқпалы ауруханасына ауыстырылып, қазір оның филиалдарына айналған.
"Мұнда қала тұрғындарына энтеровирус инфекция, ішек инфекциясы, ЖРВИ (ларингит, фарингит және т.б.), пневмония және бронхит, менингит, қызылша, гепатит, ауа тапшылығы инфекциялары сияқты жұқпалы аурулар бойынша медициналық қызмет көрсетіледі", - деді министрлік өкілдері.
Ведомство мәліметінше, жұмыс істеп тұрған қалалық балалар жұқпалы аурулар ауруханасы сонау 1980 жылы 360 төсек-орынмен салынған. Ол кезде қаладағы бала саны 100 мыңға жуық болған. Қазір олардың саны 700 мыңға жетті. Жұқпалы ауруларға арналған балалар төсек-орындарына қажеттілік артып отыр.
"Қаланың Түрксіб, Жетісу, Алатау, Әуезов және Наурызбай аудандарынан 378 бала жұқпалы аурулардан екі бөлімшеде ем алып жатыр. Бостандық, Медеу және Алмалы аудандарындағы негізгі ғимараттарында 259 бала ем алып жатыр. Қаланың ішінде балаларға және тұрғындарға ем алып, қаралуға қол жетімді", - деді ведомство өкілі.
Айта кетейік, 2020 жылғы сәуірде Алматыда коронавируспен ауыратын науқастарға арналған модульдік жұқпалы аурулар емханасы ашылып, ол 18 күнде салынған еді. Қарашада екінші модульдік аурухана ашылды. Бірінші аурухананы салудың өзіне 5 миллиард теңге қаржы жұмсалды.
2021 жылғы қаңтарда Алматының Сыбайлас жемқорлыққа қарсы іс-қимыл департаменті жұқпалы аурулар модульдік ауруханасына бөлінген ақшаның жымқырылуына қатысты тергеу басталғанын хабарлады.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Ж. Қадыржанова