Алматыда күре жолдағы қозғалыс түнгі уақытта жабылады
![Алматыда күре жолдағы қозғалыс түнгі уақытта жабылады](/userdata/news/news_114227/image_l.jpg)
Алматыда Құлжа күре жолының жаңартылған аумағында қозғалыс түнгі уақытта жабылады, - деп хабарлайды Massaget.kz тілшісі.
Алматыда Рысқұлов даңғылынан Бұқтырма көшесіне дейін Құлжа күре жолын жаңарту жұмыстары жалғасып отыр. Бұл жұмыс аясында жолдың бөлігін 4-тен 6 жолаққа дейін кеңейту көзделген.
"Жұмыс кезінде учаскеде екі бағыт бойынша екі бағытты қозғалыс болды. Алайда шілдедегі жаңбырлы ауа райына байланысты жұмыс кестесі бұзылды. Осыған байланысты жол бойындағы жұмыстар тамыз айының соңына дейін аяқтау мақсатында түнгі уақытта қосымша қозғалысқа шектеу енгізіледі", - делінген хабарламада.
Әкімдіктің хабарлауынша, 17 тамыздан 22 тамызға дейін қозғалыс түнгі уақытта Бұқтырма көшесінен Рысқұлов даңғылына дейінгі учаскеде (қалаға қарай) жабылады.
"Бұқтырма және Майлин көшелерімен солтүстік бағытта айналып өтуге болады. Ал оңтүстік бағытта Бұқтырма және Талғар тас жолы арқылы жүруге рұқсат. Жоба аясында жалпы ұзындығы 2,3 км болатын жолды қайта жаңарту көзделген. Бөлу жолағын жою және жол бөлігін кеңейту арқылы әр бағытта 3 жолақтан тұратын жол салынады. Сонымен қатар жол жиектерінде тосқауыл қоршауын, жолды жарықтандыру және су бұру тіректерін орнату қарастырылған. Жаяу жүргіншілердің қауіпсіздігін қамтамасыз ету үшін екі жағынан ені 2-ден 3 метрге дейінгі тротуар жабдықталады", - деп хабарлады әкімдік.
Instagram парақшамызға жазылып, ең қызықты ақпараттарды бірінші болып оқыңыз!
М. Лұқпан