Алматыда қоғамдық көлікте жол жүруге жаңа тарифтер бекітілді, - деп хабарлайды Massaget.kz тілшісі.
Бұл туралы мәслихаттың VII сессиясында Алматы әкімінің орынбасары Амрин Асқар мәлімдеді. "Оңай" картасымен немесе QR-код арқылы төлеген кезде жол жүру құны 100 теңгені құрайды, яғни 20 теңгеге артады. Қолма-қол ақшамен төлеген кезде жол жүру үштен біріне - 150 теңгеден 200 теңгеге дейін артады.
"Ағымдағы тариф тасымалдаушылардың шығындарын өтемейді, өйткені жол жүрудің нақты құны бекітілгеннен 3 есе қымбат. Осыған байланысты әкімдік ай сайын тасымалдаушылардың шығыстарын субсидиялар түрінде жабады. 2020-2022 жылдар аралығында төленген субсидиялар сомасы 115,8 миллиард теңгені құрады", - деп нақтылады Асқар Амрин.
Мегаполистің көлік инфрақұрылымына үлкен жүктеме түседі, бұл ретте қала билігі жолдардың жағдайына, автопаркті жаңартуға ерекше көңіл бөледі.
10 жылдан астам уақыт ішінде маршрутқа қызмет көрсетуге байланысты барлық шығындар үш есе өсті. Мысалы, 2012 жылы дизель отынының бағасы 90 теңгені, ал қазір - 295 теңгені, ал газдың құны сол кезде - 33 теңгені, ал бүгінгі күні - 108 теңгені құрады. Жалпы өсім 3,3 есені құрады. Автобустар, шиналар, майлау материалдары, автобустарға техникалық қызмет көрсету, жөндеу жұмыстары секілді шығындар бойынша да осындай жағдай қалыптасты.
Астанада тарифтің құны - 90 теңге және 180 теңге, ШҚО-да - 90 теңге және 130 теңге, Жамбыл облысында - 85 теңге және 130 теңге, Қостанай облысында - 100 теңге және 170 теңге мөлшерінде белгіленген.
"Қолма-қол ақшасыз төлеммен 100 теңге және қолма-қол төлеммен 200 теңге мөлшерінде жаңа тарифтерді қолдану биылғы жылдың өзінде субсидиялар сомасын шамамен 10 миллиард теңгеге төмендетуге мүмкіндік береді. Оларды басқа да әлеуметтік маңызы бар жобаларға қайта бөлуге болады", - деп сөзін аяқтады Алматы қаласы әкімінің орынбасары Асқар Амрин.
Соңғы рет қалада автобустармен жүру бағасы 2017 жылы көтерілді, ал 80 теңгелік тариф 2012 жылдан бері бар.
Бұған дейін әкімдіктің қоғамдық көлікте жол жүру бағасын көтеру туралы қаулысының жобасы жарияланған болатын. Онда мұндай қадам бюджет шығындарын азайту үшін қабылданғаны көрсетілген. 2017 жылдан бастап 2022 жылға дейін субсидиялар көлемі 13,8 есе, 6,9 миллиардтан 50 миллиард теңгеге дейін өсті. Ағымдағы жылы субсидиялаудың болжамды көлемі 85,5 миллиард теңгені құрады, бұл белгілі бір "бюджетке жүктеме" тудырады. Ағымдағы есептеу әдісі бойынша, субсидияларды есептемегенде жол жүрудің нақты құны 425 теңгені құрайды.
Еске салайық, бұған дейін Алматыда автобустардың "зираты" табылғанын және ол әлеуметтік желі қолданушылары арасында қызу талқыланғанын жазған болатынбыз.