Алматыда жер сілкінісі сезілді

Алматыда бүгін түнде жер сілкінісі сезілді, - деп хабарлайды Massaget.kz тілшісі.

ТЖМ мәліметінше, 17 қазанда сағат 03.23-те жер сілкінісі тіркелген. Эпицентрі Қытай аумағында, Алматы қаласынан оңтүстік-шығысқа қарай 264 шақырым жерде орналасқан.

"Алматы қаласында 2 балл болып сезілді. Зардап шеккендер туралы ақпарат жоқ", - деп жазылған хабарламада.

Айта кетейік, Алматы 9-10 балдық сейсмикалық аймақта орналасқан.

Жер сілкінісі кезінде не істеу керек?

Жер сілкінісі кезінде істеу қажет 10 қарапайым қадам бар:

• Жер дүмпуі кезінде үрейленбеңіз;
• Жер сілкінуі кезінде лифт және баспалдақ қолданбаңыз;
• Жиhаздан, терезеден ары тұрыңыз;
• Жасырынатын жер табыңыз, жоғары қабаттарда іргедегі қабырғалардың бұрышына жасырыныңыз;
• Ғимараттан шығыңыз (төменгі қабаттарда); көп қабатты үйлерде жер сілкінісі аяқталған соң ғимараттан шығыңыз;
• Кетер алдында суды, газды, электр қуатын мүмкіндігіңіз болса өшіріңіз;
• Дабыл сөмкесін алыңыз (алдын ала дайындау қажет);
• Электр желілеріне, ғимарат, ағаштарға жақындамаңыз;
• Жер сілкінуіне дайын болыңыз;
• Қарттарға, балаларға, мүмкіндігі шектеулі адамдарға көмек көрсетіңіз.

Бұған дейін Алматыда ірі жер сілкінісі қашан болды?

Алматы тұрғындары 2024 жылы 23 қаңтарда жер сілкінісін сезді. Түн ішінде болған дүмпу халықтың үрейін ұшырып, біраз уақытқа дейін қорқыныш қалып қойды.

Көктем басталысымен, 2024 жылы 4 наурызда қалада тағы бір жер сілкінісі тіркелді. Бұл да қала тұрғындары мен қонақтарын үрейлендірді.

Еске салайық, бұған дейін белгілі профессор Әлқуат Нұрмағамбетовпен сұхбаттасып, Алматыдағы жер сілкіністерінің ғылыми негізі туралы сұраған едік. 

Қызықты жаңалықтар мен видеоларды көру үшін TikTok арнамызға жазылыңыз!