Алматыда Жеңіс күні тойланды
![Алматыда Жеңіс күні тойланды](/userdata/news/news_106909/image_l.png)
Алматыда Ұлы Жеңістің 79 жылдығыyа байланысты негізгі мерекелік іс-шаралар 28 гвардияшы-панфиловшылар атындағы саябақта басталды. Алматы әкімі Ерболат Досаевтың қатысуымен Мәңгілік алауға гүл шоқтарын қою рәсімі өтті, - деп хабарлайды Massaget.kz тілшісі.
Бір минут үнсіздіктен кейін Ұлы Отан соғысының ардагерлері, тыл еңбеккерлері, әскери қызметшілер, құқық қорғау органдарының өкілдері, қоғам қайраткерлері мен қала тұрғындары қаза тапқан қазақстандық жауынгерлерді еске алуға арналған Даңқ мемориалына гүл шоқтарын қойды.
Әкім майдангерлерді мерекемен құттықтап, ұрыс алаңында және еңбек майданында көрсеткен ерліктері үшін алғыс айтып, зор денсаулық, мол бақыт, амандық тіледі.
Өз кезегінде ардагерлер кездесу барысында қала басшылығына назар аударғаны үшін ризашылық білдіріп, Алматы тұрғындары мен қазақстандықтарға бейбітшілік пен жақсылық тіледі. Сондай-ақ естелігін бөлісіп, өлең оқып, соғыс туралы әндер айтты.
28 гвардияшы - панфиловшылар атындағы саябақта қала тұрғындары мен қонақтары үшін далалық ас үй ұйымдастырылды, мерекелік концерт өтіп, қазақстандық артистер майдан әндері мен соғыстан кейінгі жылдардағы әндерді шырқады.
Сондай-ақ, Алматыда Б.Момышұлы монументіне, Т.Бигелдинов, С.Нұрмағамбетов мемориалдық тақтасына, С.Луганский бюстіне, Ә.Шәріпов ескерткішіне, "Отан ұлдарына мәңгілік естелік", "Белгісіз сарбаздың қабірі" және "Отан үшін шайқаста қаза тапқан батырларға мәңгілік даңқ" мемориалдарына гүл шоқтарын қою рәсімдері өтті.
Аптаның басты оқиғалары мен пайдалы видеоларды көру үшін YouTube арнамызға жазылыңыз
А. Жайыққызы