Алматыда бейбіт жиындар мен шерулер өткізу орындары өзгерді. Мәслихат депутаттары бұқаралық іс-шаралар кезінде көшелер жабылуына байланысты көлік қозғалысына кедергі келтірмеу мақсатында кезекті XXII сессияда тиісті шешім қабылдады, - деп хабарлайды Massaget.kz тілшісі.
Қоғамдық даму басқармасының басшысы Айдар Есенбеков бейбіт жиналыстар өткізуге арналған мамандандырылған орындар - М.Ганди атындағы саябақ, Ш.Уәлиханов атындағы және "Сарыарқа" кинотеатрының артындағы скверлер екенін айтты.
Енді санкцияланған шерулер немесе демонстрациялар өткізу бағыты өзгереді. Жаңа бағыт Жамбыл көшесі мен Гагарин даңғылынан Мұқанов көшесіне дейін өтеді. Шевченко көшесіндегі бұрынғы бағыт көліктерге кедергі келтірген, өйткені ол Сейфуллин, Назарбаев, Абылай хан даңғылдары, Желтоқсан, Наурызбай батыр көшелері сияқты қаланың негізгі магистральдық артерияларын кесіп өтетін.
"Жамбыл көшесіндегі жүктеме азаяды, Гагарин даңғылынан Мұқанов көшесіне дейінгі аралықта 2 жолақ қарастырылған, сонымен қатар магистральдық көшелер мен қиылыстар жоқ. Депутаттар бұл өзгерістерді көпшілік дауыспен қолдады", - деп жазылған хабарламада.
Аптаның басты оқиғалары мен пайдалы видеоларды көру үшін YouTube арнамызға жазылыңыз