Алматы қаласы Медеу ауданының №2 аудандық соты, алдын ала сөз байласу арқылы қызмет бабын пайдаланып, адамдар тобы жасаған аса ірі мөлшерде, сенiп тапсырылған бөтен мүлiктi иемденiп алу немесе талан-таражға салу бойынша айыпталған Г., Д. және А.ға қатысты қылмыстық істі қарады, - деп хабарлайды Massaget.kz тілшісі.
Іс материалдарындағы мәліметтер бойынша сотталушылар экономика және қаржы, есеп бөлімінде басшылық қызметте болған, 2019-2022 жылдар аралығында олимпиада қорын қолдауға бағытталған және сөйлеу қабілеті бұзылған балаларға арналған бюджет қаражатын ұрлаумен айналысқан.
Схемалар осы ұйымдарда нақты тіркелмеген адамдарға жалақы төлемдерін өңдеу үшін бухгалтерлік бағдарламаларды пайдаланудан тұрды. Жалған есептелген қаражат, сотталушылар бақылайтын банк карталарына аударылған. Сонымен қатар негізсіз бонустар алу үшін әрекеттер жүргізілді.
Қызметкерлер жалақыны жоғарылатып алған. Сотталушылар жалақының айырмасын қолма-қол қайтаруды талап еткен, бұл қаражатты банкомат арқылы шығарып, жеке мүдделеріне жұмсаған.
Заңсыз әрекеттер нәтижесінде келтірілген жалпы шығын 150 миллион теңгеден астам.
Барлық сотталушылар өз кінәсін мойындамай, аталған операциялар өздерінің қызметтік міндеттері аясында жүргізілгенін айтып, бухгалтерлік есеп бағдарламаларындағы қателерді алға тартты.
Алайда айыптау тарапы дәлел ретінде сотталушылардың заңсыз әрекеттерін растайтын бухгалтерлік жазбаларды, төлем құжаттарын және банк көшірмелерін ұсынды. Сотталушылар есепшоттарындағы қаражаттың қайдан шыққанын және қызметкерлерге артық төлемдердің жиналу себептерін түсіндіре алмады. Кейбір қызметкерлер артық есептелген соманы қайтару туралы көрсетпелер берді.
Іс-әрекеттердің қасақана жасалғанын, алдын ала сөз байласуын және жиналған дәлелдемелерді ескере отырып, сот сотталушыларды кінәлі деп танып, Г-ға 7 жыл, Д-ға - 6 жыл, А-ғаға - 8 жылға бас бостандығынан айыру жазасы тағайындалды, мүлкілері тәркіленді.
Үкім заңды күшіне енген жоқ.
Қызықты жаңалықтар мен видеоларды көру үшін TikTok арнамызға жазылыңыз!