Алматыда 15 қыркүйекке дейін тағы бір көше жабылады

Алматыда 15 қыркүйекке дейін Байқадамов көшесіндегі көлік қозғалысы шектеледі, - деп хабарлайды Massaget.kz тілшісі "Алматы жылу желілері" ЖШС-не сілтеме жасап.

Алматыда Байқадамов көшесіндегі 1984 жылдан бері пайдаланылып келе жатқан 1,2 шақырымнан астам құбыр ауыстырылады. 

2024 жылғы 12 маусым мен 15 қыркүйек аралығында Алматы қаласының Бостандық ауданында Байқадамов көшесінде Розыбакиев көшесінен Гагарин даңғылына дейін, сондай-ақ Радостовец көшесінде Байқадамов көшесінен Журавлев көшесіне дейін көлік қозғалысы шектеледі.

Қозғалыс екі жаққа да жабылады.

1984 жылдан бастап пайдалануға берілген, аталған көшенің астындағы жалпы ұзындығы 1220 метр құбырды қайта жаңарту аумағында жоспарлы жұмыс жүргізу қауіпсіздігін қамтамасыз ету үшін уақытша шектеулер енгізіледі.

Бұл құбыр 97 көппәтерлі тұрғын үйді, 12 жеке үйді, 4 балабақшаны, 2 денсаулық сақтау нысанын және 27 өзге де нысанды жылумен және ыстық сумен қамтамасыз етеді. Аталған аумақтағы тұтынушыларға реконструкция кезінде ыстық су беру тоқтатылмайды.

2024 жылы жалпы ұзындығы 20 км болатын 23 нысанды қайта жаңарту жоспарланып отыр, бұл жыл сайынғы көрсеткіштен екі есе көп. 25 жылдық нормативтік қызмет ету мерзімі өткен құбырлар енді 30 немесе одан да ұзақ жыл жұмыс істеуге арналған алдын ала оқшауланған құбырларға ауыстырылады. Бұл жылу шығынын, сондай-ақ желілердің тозуын шамамен 1,8% төмендетуге мүмкіндік береді. Биыл Алматыда жылумен жабдықтау желілерінің тозуы 57,9% болды (1385,3 км-ден 802,6 км).

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!