Алматының тауларында бір күнде 2 турист құтқарылды, - деп хабарлайды Massaget.kz тілшісі ТЖМ баспасөз қызметіне сілтеме жасап.
Ведомство мәліметінше, кеше Республикалық жедел-құтқару жасағының құтқарушылары Іле Алатауы тауларының шатқалдарындағы таулы өзендер бойымен рейдтер жүргізген.
"Рейд кезінде сағат 17.27-де құтқарушыларға көмек сұрап мопед мінген турист келгді. Оның досы отбасымен демалып отырған жерінде, кенеттен ауырып қалыпты. Құтқарушылар аталған орынға жедел жетіп, ер адам жерде ес-түссіз күйде эпилепсиялық ұстама болып жатқанын көрген. Құтқарушы - медик Евгений Мұстафин жедел түрде алғашқы медициналық көмек көрсетуге кірісті. Құтқарушылар 38 жастағы ер адамды өзіне-өзі келгеннен кейін, РЖҚЖ жедел көлігіне отырғызып, қалаға дейін алып барып, жедел жәрдем бригадасына тапсырды. Жедел жәрдем көлігі тауға көтеріле алмады", - делінген хабарламада.
Екінші құтқару оқиғасы Кіші Алматы өзенінің шатқалына жасалған рейд кезінде болған.
Сағат 18.30-да құтқарушыларға туристтің жарақат алуының куәгері болған адам жүгінген. Зардап шеккен адамның айтуынша, ол аяғының саусағын сындырып алғандықтан, өздігінен жүре алмаған. ТЖМ қызметкерлері оған алғашқы медициналық көмек көрсетіп, зақымдалған аяқ бөлігін бекітіп, таңғышпен таңды. Содан кейін альпинистік арқандардың көмегімен әйелді "Лесничество" жартасынан, таудың етегіне апарып туыстарына тапсырды. Олар жедел жәрдем шақырудан бас тартып, ауруханаға өздері баруға шешім қабылдады.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!