18-24 қазан аралығында Жапонияның Аичи префектурасы мен Нагоя қаласында V Азия Пара ойындары өтті. Ұлттық құрама сапында бақ сынаған алматылық спортшылар 11 медаль еншілеп қайтты, - деп хабарлайды Massaget.kz.
Қазақстан ұлттық құрамасы Азия Пара ойындарын 12 алтын, 16 күміс және 22 қола медальмен аяқтап, жалпыкомандалық есепте тоғызыншы орынға тұрақтады. Алматылық спортшылар Қазақстан құрамасы жеңіп алған алтын медальдардың үштен бірін және жалпы жүлделерінің бестен бірінен астамын иеленді. Яғни, 4 алтын, 6 күміс, 1 қола медаль жеңіп алды.
Алматы спортшыларының нәтижесіне паравелоспорт өкілдері үлкен үлес қосты. Олар трек пен тас жолдағы жарыстарда төрт алтын, төрт күміс және бір қола медаль (тоғыз жүлде) еншіледі.
Анастасия Калаус пен оның пилоты Полина Братчикова екі дүркін Азия Пара ойындарының чемпионы атанды. Олар жекелей уақытқа жарысу және тас жолда 55 шақырымдық топтық жарыс бойынша топ жарды. Сондай-ақ спортшылар тректе 4000 метр қашықтықтағы жарыста күміс медаль иеленді.
Наиль Ермұханбет пен оның пилоты Руслан Әлиев те екі алтын медаль жеңіп алды. Алматылық тандем 20 шақырымдық уақытқа жеке жарыста жарысу және 65 шақырымдық топтық жарыста жеңімпаз атанды.
Кирилл Ильюкевич пен оның пилоты Глеб Брусенский үш рет жеңімпаздар тұғырына көтерілді. Олар тас жолдағы жарыстарда екі күміс медаль, ал тректегі 4000 метрлік жарыста қола жүлде иеленді.
Жұлдыз Қайнарова мен оның пилоты Анжела Соловьева әйелдер арасындағы 55 шақырымдық топтық жарыста күміс жүлдегер атанды. Осылайша, бұл сайыста алматылық тандемдер бірінші және екінші орынды иеленді. Қала спортшылары ерлер арасындағы тас жолдағы екі жарыста да бірінші және екінші орындарды жеңіп алды.
Алматы спортшылары арасында тағы екі күміс медальді парадзюдо мен парапауэрлифтинг өкілдері салды.
Жанбота Аманжол парадзюдодан J2 класында 95 келіге дейінгі салмақ дәрежесінде екінші орын алды. Ол 2023 жылы Азия Пара ойындарындағы жетістігін қайталап, қатарынан екінші рет күміс жүлдегер атанды.
Алина Солодухина парапауэрлифтингтен 45 келіге дейінгі салмақ дәрежесінде 103 келі салмақты көтеріп, күміс медаль жеңіп алды. Бұған дейін, 2018 жылы ол Азия Пара ойындарының қола жүлдегері атанған болатын.
Азия Пара ойындарында Алматы атынан спорттың алты түрі бойынша 20 спортшы бақ сынады. Олар Қазақстан құрамасы жеңіп алған барлық медальдың 22 пайызын және алтын жүлделердің үштен бірін еншілеп келді.