Алматы облысында браконьерден 50 келіден аса заңсыз ауланған балық тәркіленді

Алматы облысының полицейлері браконьерден 50 келіден аса заңсыз ауланған балық тәркіледі, - деп хабарлайды Massaget.kz тілшісі.

27 қазанда "Браконьер" жедел-профилактикалық іс-шарасын өткізу барысында Балқаш ауданының Құйған ауылы маңында полицейлер көрші Жамбыл облысының 45 жастағы тұрғынын ұстады. Ер адам моторлы қайықпен және тыйым салынған моножіпті торлармен балық аулады.

"Тінту кезінде құқықбұзушыдан 50 келіден астам көксерке, сондай-ақ заңсыз аулау құралдары табылды. Күдіктіге қатысты балық ресурстарын заңсыз өндіру фактісі бойынша сотқа дейінгі тергеу басталды. Мемлекетке келтірілген залал 425 844 теңге", - деп атап өтті Балқаш аудандық полициясының бастығы Айдар Умаров.

Тәркіленген балық кейіннен сату және мемлекет пайдасына түскен қаражатты аудару үшін қабылдау пунктіне өкізілді.

Естеріңізге сала кетейік, 20 қазаннан 19 қарашаға дейін облыс аумағында "Браконьер" жедел-профилактикалық іс-шара өткізіледі, оның мақсаты - табиғатты қорғау заңнамасын бұзу және табиғатты заңсыз пайдалану, сатып алу, өткізу орындары, заңсыз өндірілген объектілер мен биоресурстар өнімдерін сату фактілерін анықтау.

Өзекті жаңалықтарды өз уақытында оқу үшін Facebook парақшамызға жазылыңыз!