Алматы облысында бір тәулікте үш барымташы ұсталды

Жамбыл ауданында полиция қызметкерлері 12 бас жылқыны ұрлау туралы резонанстық істі ашты, - деп хабарлайды Massaget.kz тілшісі.

Оқиға 8 қарашада Ақдала ауылында болды. Шаруа қожалығының иесі жалпы құны 10,6 млн теңгені құрайтын 12 бас жылқының ұрланғаны туралы арызданды. Полиция қылмыстық істі тіркеп, дереу іздеуге кірісті.

"Жедел-іздестіру іс-шаралары барысында күдікті ұсталды. Ол бұрын сотталған жергілікті тұрғын болып шықты. Жауап алу кезінде ол өзінің кінәсін толық мойындады. Ер адам уақытша ұстау изоляторына қамалды. Қазіргі уақытта оның басқа да осындай қылмыстарға қатысы бар-жоғы тексеріліп жатыр", -  деп хабарлады полицияда.

Осыған ұқсас мал ұрлық оқиғалары Іле және Еңбекшіқазақ аудандарында тіркелді, онда қаскүнемдер бір жылқы мен ірі қара малды ұрлап әкеткен. Криминалдық полиция қызметкерлерінің үйлесімді жұмысының арқасында күдіктілер ұсталды. Қылмыстық істер қозғалды, тергеу жүргізіліп жатыр.

Полиция мал иелеріне сақтық шараларын ұстану керектігін ескертеді. Мал ұрлығы жағдайларының көпшілігі тірі мүлікті қорғауға немқұрайлы қарауға байланысты. Тәртіп сақшылары азаматтарды қаскүнемдердің құрбаны болмас үшін малды тиісті қараусыз қалдырмауға шақырады.

Аптаның басты оқиғалары мен пайдалы видеоларды көру үшін YouTube арнамызға жазылыңыз