Алматы облысында 18 көлік жол апатына түсті, - деп хабарлайды Massaget.kz тілшісі.
Оқиға Алматы-Өскемен тасжолында болған.
"15 қаңтарда сағат 07:30 шамасында Алматы-Өскемен тасжолының (Алматы - Қонаев бағыты) 28-шақырымында 18 көлік жол апатына ұшырады", - деп жазылған хабарламада.
ҚазАвтоЖол мәліметінше, жол апаты қалың тұманның салдарынан болған.
"Алдын ала ақпарат бойынша жол апатының себебі жүргізушілердің жылдамдық режимін және қашықты сақтамауы болды. Оқиға болған жол учаскесі ІА техникалық санатына жатады, 6 жолағы бар. Жол құрғақ, ақаулары мен бөгде заттары болмаған. Апаттан зардап шеккендер мен қаза тапқандар жоқ. Оқиғаның мән-жайы нақтыланады", - деп жазылған хабарламада.
Еске салайық, 3 қаңтарда Астана - Щучинск тасжолында 40 көлік соқтығысты. Ақмола облысы Біржан сал ауданының Қоғам ауылы мен Қаратал ауылы арасында күн (боран) бұзылды.
Кейінірек Астана маңындағы тасжолда соқтығысқан көліктер саны 95-ке жетті. Бұл туралы "ҚазАвтоЖол" мәлімдеді.
Instagram парақшамызға жазылып, ең қызықты ақпараттарды бірінші болып оқыңыз!