“Алматы жастары“ бағдарламасы қашан басталатыны белгілі болды

Алматыда 1 маусымда "Алматы жастары" бағдарламасына өтініш қабылдау басталады, - деп хабарлайды Massaget.kz тілшісі.

Өтініш қашан қабылданады?

Қала әкімдігі мәліметінше, өтініш қабылдау биыл 1-15 маусым аралығында өтеді. Өтінішті kezekte.kz порталындағы "Тұрғын үй сервистері" бөлімінде орналасқан Almaty Jastary сервисі арқылы 1 маусым сағат 09:00-ден бастап 15 маусым сағат 18:00-ге дейін жолдауға болады. Жүйеге кіру үшін электрон цифрлық қолтаңба (ЭЦҚ) қажет.

Бағдарлама аясында қатысушыларға мынадай шарттар ұсынылады:

• несие көлемі 20 миллион теңгеге дейін;
• жылдық мөлшерлеме - 5%;
• бастапқы жарна - 10%;
• бастапқы және қайталама нарықтан баспана сатып алуға мүмкіндік беріледі.

Жобаға Алматы қаласында тұратын 35 жасқа дейінгі жастар қатыса алады.

Қатысушыларға қойылатын негізгі талаптар:

• Алматы қаласында кемінде бір жыл тұрақты тіркеуде болу;
• кейінгі бес жылда үміткердің және оның отбасы мүшелерінің атында үй болмауы;
• Алматыда кемінде алты ай ресми жұмыс өтілі мен міндетті зейнетақы аударымы болуы.

Бағдарлама денсаулық сақтау, білім беру, мәдениет, спорт салаларының қызметкерлеріне, ЖОО мен ғылыми-зерттеу институттарының мамандарына, журналистерге, әлеуметтік сала өкілдеріне, құқық қорғау органдары мен коммуналдық қызмет қызметкерлеріне, сондай-ақ, "Жұмыс істейтін жастар" бағдарламасының жалға алушыларына арналған.

Аптаның басты оқиғалары мен пайдалы видеоларды көру үшін YouTube арнамызға жазылыңыз