Алматы ауруханасында жаңа туған сәбилердің сатылғаны анықталды, - деп хабарлайды Tengrinews.kz тілшісі Алматы прокуратурасының әлеуметтік-экономика саласының заңдылығын қадағалау департаменті басшысының орынбасары Дінмұхамет Серікбаевқа сілтеме жасап.
"Кәмелетке толмағандарды сатудың схемасы анықталды, оны Алматы облысының тұрғындарына қызмет көрсетуші Алматы көп салалы клиникалық ауруханасының қызметкерлері жүзеге асырған. Атап айтқанда, Шавдунова мен Сауытованың аурухана қызметкерлері бола тұра бес жыл бойы түрлі сомада жаңа туылған сәбилерді сатумен айналысқандары анықталды", - деді Серікбаев ОКҚ филиалында өткен брифинг барысында.
Оның айтуынша, тексеру барысында аурухананың акушер-гинекологы мен медбикелерінің де бала сатумен айналысқандары белгілі болды. "Тексеру барысында жаңа туылған сәбилерді сатуға байланысты бес дерек тіркелді, балалар жалпы сомасы 10 мың доллар және 150 мың теңгеге сатылған. Бұл деректерге қатысты қылмыстық іс қозғалды, күдіктілер тұтқынға алынды. Қылмыстық іс қазіргі таңда тергеу органдарында өндірісте жатыр", - деді спикер.
Еске сала кетейік, бұған дейін Оңтүстік Қазақстан облысындағы №1 перинаталдық орталықта бас тартылған-жаңа туылған сәбилердің сатылып келгені хабарланған болатын. Ол кезде жаңа туылған нәрестелерді сатты деген күдікпен №1 перинаталдық орталықтың бөлім меңгерушісі мен неонатолог-дәрігері ұсталды. Олар белгілі бір уақыт ішінде баласыз отбасыларға, аналары босана салып бас тартқан сәбилерді сатып отырған. Сәбилердің құны 1-ден 3 мың долларға дейінгі аралықта болған. Сәбидің жаңа анасына ол перинаталдық орталықта босанды деп құжат рәсімделген.