Алматы әуежайында ұрлық жасаған қызметкер сотталды

Алматы қаласының әуежайындағы желілік полиция бөлімінің қызметкерлері, Алматы қаласының Авиациялық көлік прокуратурасының үйлестіруімен, Алматы – Дубай, Алматы – Прага және Алматы – Гонконг халықаралық бағыттары бойынша әуежайдағы уақытша сақтау қоймасы аумағында бөтеннің мүлкін бірнеше рет ұрлаумен айналысқан 29 жастағы азаматтың қылмыстық әрекетінің жолын кесті, - деп хабарлайды Massaget.kz тілшісі Polisia.kz-ке сілтеме жасап.

Ұсталған азамат әуежайдың уақытша сақтау қоймасында жүк тиеуші болып жұмыс істеп жүріп, осы жылдың қаңтар-наурыз айлары аралығында жалпы сомасы 7 645 371 теңгеге мүлікті ұрлаған.

Көлік полицейлерімен жедел тәртіпте ұрлық фактісі бойынша сотқа дейінгі тергеп-тексеру жүргізуі барысында заттай дәлелдемелер тәркіленді. Алматы қаласы Түрксіб аудандық сотының үкімімен құқық бұзушы барлық ауыр фактілер бойынша кінәлі деп танылып, оған 3 жыл 6 айға бас бостандығынан айыру жазасы тағайындалды.

Өз кезегінде, полицейлер еліміздің әуе көлігі қызметтерін пайдаланатын азаматтарға жеке заттарына қырағы болуды, сақтық шараларын сақтауды, құқық бұзушылық анықталған жағдайда құқық қорғау органдарына дереу хабарлауды еске салды.

Instagram парақшамызға жазылып, ең қызықты ақпараттарды бірінші болып оқыңыз!