Алдын ала зерттеген: Астанада спорттық бутиктен киім ұрлаған қыз ұсталды

Астанада 23 жастағы қыз дүкенде магнит жапсырмасын алып, киімді үстіне киіп, бутиктен шығып кеткен, - деп хабарлайды Massaget.kz тілшісі.

Нұра ауданы полиция басқармасы қызметкерлері жедел-іздестіру іс-шаралары барысында ұрлыққа қатысы бар қызды анықтады. Бұған дейін де ол осыған ұқсас қылмыс жасағаны үшін қылмыстық жауапкершілікке тартылған.

Қыздың айтуынша, сауда орталығына келмес бұрын ол интернет желісі арқылы киімдегі магнит жапсырманы шешу жолдарын зерттеген.

Сауда залында орналасқан бейнебақылау камераларын қарау кезінде жедел уәкілдер бойжеткеннің заттармен бірге киім ауыстыру бөлмесіне кіріп, кейін қолында ештеңесіз шыққанын байқады. Ол жалпы құны 133 мың теңге болатын спорттық киімді сатып жіберген.

Аталған факті бойынша сотқа дейінгі тергеу басталды, бойжеткеннің елорда аумағында осыған ұқсас қылмыстарға қатысының бар-жоғы тексеріліп жатыр.

Аптаның басты оқиғалары мен пайдалы видеоларды көру үшін YouTube арнамызға жазылыңыз