Алаяқтар ҚМА атынан хат жіберетін болған: азаматтарға ескерту жасалды

Қаржылық мониторинг агенттігі алаяқтар агенттік атынан жалған ресми хаттар таратып жатқанын мәлімдеді, - деп хабарлайды Massaget.kz тілшісі.

Агенттікке осындай жалған хат таратудың тағы бір дерегі туралы ақпарат түскен. Мемлекеттік органға жолданған хатта қаскөйлер тексеріс жүргізіліп жатқанын алға тартып, азамат туралы мәліметті, соның ішінде оның мінездемесі мен өзге де ақпаратты сұратқан.

"Бұған дейін де алаяқтар осыған ұқсас тәсілді қолданған. Олар жалған хаттар жібергеннен кейін азаматтарға телефон немесе мессенджер арқылы хабарласып, өздерін ҚМА қызметкерлері ретінде таныстырған. Түрлі сылтаумен азаматтардың жеке және банк дерегін алуға тырысқан немесе ақша бопсалаған", - деді ҚМА өкілдері.

Ведомство азаматтарға мынадай ескерту жасады:

• агенттіктің ресми хаттары тек белгіленген тәртіппен жолданады;
• ҚМА қызметкерлері телефон арқылы банк шоттарының дерегін беруді немесе ақша аударуды талап етпейді;
• құжатта логотип, мөр немесе қолтаңба бар екеніне сүйеніп, оған сенуге болмайды;
• күмәнді хат алсаңыз, оның шынайылығын агенттіктің ресми байланыс арналары арқылы тексеріңіз.

"Күмән туындаған жағдайда 1458 Call орталығына немесе +7 (7172) 70-84-79 телефоны арқылы кезекші бөлімге хабарласыңыз", - деп ескертті агенттік өкілдері.

Instagram парақшамызға жазылып, ең қызықты ақпараттарды бірінші болып оқыңыз!