Ақтөбелік зейнеткер үш айдан бері өзінің тірі екенін дәлелдей алмай жүр

Ақтөбелік зейнеткер 3 айдан бері өзінің тірі адам екенін дәлелдей алмай жүр. Емханадағы статист-дәрігер жеке сәйкестендіру нөмірінде бір санды қате жазып, ол өлілер тізіміне еніп кеткен, - деп хабарлайды "Астана" телеарнасы.

Телеарна мәліметінше, Ромахан Кенжебаевтың қазір барлық құжаты жарамсыз болып қалған. Емхана сол кезде қателігін бірден мойындап, құжаттарын реттеп берген, бірақ зейнеткер үш айдан бері өзіне тиесілі зейнетақысын ала алмай жүр.

"Үш ай бұрын басталды. Мені өлтіріп тастады. Зейнетақымды ала алмай жүргеніме үш ай болды. Әр күні ертең, ертең, арғы күні ертең дейді", - қала тұрғыны Ромахан Кенжебаев.
 

"Азаматтарға арналған үкімет" корпорациясының облыстық филиалына зейнеткердің "қаза болғаны" туралы мәлімет 7 қазанда түскен. Заң бойынша келер айдан бастап зейнетақы төлеу тоқтатылған. Ал қате кеткенін бұл орталықтың мамандары тек үш апта бұрын естіпті.

"Мәлімет анықталған бойда Азаматтарға арналған үкімет корпорациясының қызметкерлері барлық шараны орындап, аталған азаматтың зейнетақысы алдағы айдың 1-нен бастап жүргізіледі, - дейді "Азаматтарға арналған үкімет" мемлекеттік корпорациясы Ақтөбе облыстық филиалының маманы.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!