Ақтөбедегі түнгі клубта екі жігітті ұрып өлтірген күзетшілер сотталды

Ақтөбеде түнгі клубтағы төбелес кезінде екі жігітті ұрып өлтірген күзетшілерге үкім шықты. Енді олар ұзақ мерзім түрмеде отырады, - деп хабарлайды Massaget.kz тілшісі.

КТК телеарнасының хабарлауынша, үкімді тыңдауға келгендер көп болды. Сотталушы жігіттердің жақындары сот залына сыймай, кейбіреуі дәлізде отырып тыңдады. Сот басталмай тұрып, қамауда отырғандар қолындағы кісенді шешуді талап етіп шу шығарды. Адамның көптігінен қауіпсіздік үшін арнайы жасақ сарбаздары да тартылған.

Түнгі клубтағы оқиға осыдан бір жыл бұрын болған. Темір ауданынан Ақтөбеге жарысқа келген төрт жігіт ойын-сауық кешенінде күзетшілермен сөзге келіп төбелеседі. Он жігіт оларды жабылып ұрып есінен тандырады. Онымен қоймай, 31 жастағы Амандық Күшкінбаев пен 27 жастағы Серік Төлеуовті пышақтап өлтіреді. Мәйіттерді екі көлікке тиеп өзен жағасына лақтырып кеткен.

Осы қылмыс бойынша адам өлтіргені үшін екі сотталушы 15 пен 17 жылға бас бостандығынан айырылды. Тағы алты жігіт "Бұзақылық" бабы мен қылмысты тиісті органдарға хабарламағаны үшін 4 жыл, қалған алтауы екі жарым жыл түрмеде отыратын болды. Тек 17 жастағы жасөсіпірім сот залынан босатылды. Ол бір жыл бойы тәртіп сақшыларының бақылауында болады.

"Мұхамеджановқа қолданылған күзетпен ұстау түріндегі бұлтартпау шарасы үкім заңды күшіне енгенге дейін ешқайда кетпеу және тиісті мінез-құлық туралы қолхатқа өзгертілсін. Мұхамеджанов сот залынан дереу қамаудан босатылсын", - деді Ақтөбе облысы қылмыстық істер жөніндегі мамандандырылған ауданаралық сотының судьясы Нұрлан Бақтығалиев.

Өзекті жаңалықтарды өз уақытында оқу үшін Facebook парақшамызға жазылыңыз!